Begaj feston Fiter Bajramin në Golem: Vlerat e Ramazanit të na udhëheqin gjithmonë

Presidenti i Republikës, Bajram Begaj, festoi Fitër Bajramin në Golem mes besimtarëve myslimanë, nga ku përcolli urimet për të gjithë shqiptarët.

“Zgjodha të jem në Golem, në këtë xhami të mrekullueshme, për të uruar të gjithë besimtarët myslimanë: Gëzuar Fitër Bajramin!” - deklaroi Presidenti i Republikës gjatë vizitës në xhaminë e Golemit.

Kreu i Shtetit theksoi se vlerat që mbart muaji i Ramazanit, si: përkushtimi, vetëpërmbajtja dhe sakrifica, duhet të jenë pjesë e jetës së secilit, në çdo kohë dhe për çdo brez.

“Vlerat që mbart Ramazani nuk duhet të na shoqërojnë vetëm gjatë këtij muaji. Ato duhet të jenë tonat dhe të na udhëheqin gjatë gjithë ditëve të vitit dhe përgjatë gjithë jetës sonë”, - u shpreh Presidenti Begaj.

Kreu i Shtetit uroi për çdo besimtar agjërim dhe lutje të pranuara, si dhe gëzim e bekime për të gjithë:

“Pas muajit të shenjtë të Ramazanit, uroj që Zoti t’ju ketë pranuar agjërimin, lutjet dhe përkushtimin tuaj!
Uroj që të gjithë besimtarët myslimanë dhe të gjithë shqiptarët të kenë gëzim dhe çdo të mirë në jetën e tyre!
Paqe në zemrat tuaja, dritë në shpirtin tuaj dhe bekime në çdo minutë të jetës suaj!”

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)