“Vrasje nga pakujdesia”: Shtatë persona në gjyq për vdekjen e 3-vjeçarit, pas ndërhyrjes në 14 dhëmbë

Ndarja nga jeta e djaloshit 3-vjeçar, Brian Spahiu në shtator të vitit 2023 tronditi rëndë opinionin. I mituri i’u nënshtrua ndërhyrjes në 14 dhëmbë në klinikën “Splendent” në Tiranë, të drejtuar nga R.Xh. dhe I.Xh. Por, vetëm pak orë pasi u kthye në shtëpi, ai u dërgua me urgjencë në Pediatrinë e spitalit “Nënë Tereza”, në gjendje të rëndë shëndetësore.

Më 28 shtator 2023, i mituri përfundoi në koma dhe me insuficencë respiratore akute. Vetëm disa ditë më vonë, ai ndërroi jetë në spital. Tashmë, Prokuroria e Tiranës përfundoi hetimet për ngjarjen, duke dërguar në gjyq shtatë persona. Tre prej tyre, mjeku me inicialet R.Xh., vajza e tij, I.Xh. dhe një tjetër dentist me inicialet M.G., akuzohen për “vrasje nga pakujdesia” dhe “për mashtrim”.

Akuza e fundit u ngrit sepse klinika ka marrë nga prindërit e fëmijës pagesën për mbushjen e 14 dhëmbëve, por në fakt rezultoi se gjashtë prej dhëmbëve ishin hapur dhe nuk ishin mbushur. Gjithashtu, I.XH akuzohet se vazhdonte aktivitetin në mënyrë të paligjshme edhe pas ngjarjes.

Mes personave që përfunduan në gjyq janë edhe mjekët roje të Pediatrisë, me inicialet V.A. dhe D.S., që sipas Prokurorisë nuk zbatuan protokollet mjekësore për të përcaktuar diagnozën e duhur dhe rrjedhimisht trajtimin me antibiotikë të përshtatshëm. Gjithashtu të akuzuar janë edhe dy ekspertë të ekspertizës mjekoligjore, me inicialet E.S. dhe E.A., për shkelje të rëndë të protokolleve mjekësore në kryerjen e autopsisë.

Prokuroria kreu riekspertim mjekoligjor, e mbështetur edhe nga ekspertë italianë. Ata zbuluan se “shkaku kryesor i vdekjes së pacientit ishte shoku septik i rëndë”. Sipas ekspertizës “anestezisti dhe stomatologët që trajtuan të miturin kanë shkelur rëndë protokollet mjekësore” të cilat kanë lidhje të drejtpërdrejtë me vdekjen e tij.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)