I shau gruan në dyqan, polici i "Shqiponjave" e merr në komisariat dhe rreh qytetarin

Një efektiv policie në Fier është pezulluar nga detyra pas një incidenti të ndodhur në ambientet e Stacionit të Policisë në Patos.

Drejtoria e Standardeve Profesionale ka vendosur pezullimin e inspektorit K. Gj., me detyrë trupë shërbimi operacionale në Forcën e Posaçme “Shqiponja”, pas dyshimeve se ai ka ushtruar dhunë ndaj një shtetasi të shoqëruar.

Sipas të dhënave paraprake, ngjarja dyshohet të ketë ndodhur më 21 shkurt 2026, kur shtetasi ishte shoqëruar në polici pas një konflikti të ndodhur në një market në qytetin e Patosit. Gjatë konfliktit, ai dyshohet se kishte ofenduar bashkëshorten e efektivit të policisë, e cila punonte në atë subjekt tregtar.

Sipas AMP, pas shoqërimit në komisariat, inspektori dyshohet se ka goditur qytetarin në ambientet e brendshme të stacionit policor.

Ndërkohë që Drejtoria e Standardeve Profesionale ka nisur hetim administrativ për rastin, AMP po vijon hetimet penale për sqarimin e plotë të rrethanave të ngjarjes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)