Pezullohet nga detyra polici në Elbasan, ndihmonte anëtarë të krimit

Agjencia e Mbikëqyrjes Policore ka ekzekutuar vendimin e Gjykatës së Elbasanit, e cila ka vendosur tre masa sigurie ndaj një efektivi policie të dyshuar për shpërdorim detyre dhe përkrahje të autorëve në krim.

Sipas AMP-së, ndaj inspektorit me iniciale E. K., me detyrë Oficer i Patrullës së Përgjithshme, janë caktuar masat e sigurisë “Pezullim nga ushtrimi i një detyre apo shërbimi publik”, “Ndalim i daljes jashtë shtetit” dhe “Detyrim për t’u paraqitur në policinë gjyqësore”.

“Efektivi dyshohet për veprat penale “Shpërdorim i detyrës” dhe “Përkrahje e autorit të krimit”, të parashikuara nga nenet 248 dhe 302 të Kodit Penal”, sqaron AMP.

Sipas hetimeve të zhvilluara në kuadër të një procedimi penal të regjistruar gjatë vitit 2025, dyshohet se punonjësi i policisë, duke shpërdoruar detyrën, ka ndihmuar persona me precedent penal në aktivitetin e tyre të kundërligjshëm.

AMP bën me dije se hetimet vijojnë për dokumentimin e plotë të kësaj veprimtarie të dyshuar kriminale, si dhe për identifikimin e personave të tjerë të mundshëm të përfshirë në këtë rast.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)