Lëvizte nga Paraguaji në Brazil, dy vite në 'lupë', si u lokalizua Ervin Mata nga Interpoli

Ervin Mata, i shpallur në kërkim nga SPAK për trafik ndërkombëtar kokaine, është arrestuar në Brazil pas rreth tre vitesh në arrati. 39-vjeçari pritet të ekstradohet drejt Shqipërisë, ku përballet me akuza të rënda për trafik narkotikësh, pastrim parash dhe përfshirje në grup të strukturuar kriminal.

Arrestimi i tij u realizua mbrëmjen e 25 prillit nga forcat speciale braziliane. Mata u ndalua në Ilhabela, në bregdetin e Sao Paulo-s, nga Policia Federale dhe Policia Ushtarake lokale.  Në një deklaratë për CNN Brazil, Policia Ushtarake deklaroi se bosi shqiptar i drogës u gjet pasi informacionet e inteligjencës treguan se ai ishte zhvendosur nga rajoni Baixada Santista në Bregun Verior.

Ooperacioni erdhi pas një ndjekjeje të gjatë nga Policia e Shtetit dhe Interpol Tirana, të cilat prej më shumë se dy vitesh monitoronin lëvizjet e tij në disa shtete të Amerikës Latine.

Në momentin e ndalimit, autoritetet braziliane i kanë sekuestruar Matës disa dokumente të falsifikuara. Sipas burimeve policore, ai mbante me vete një pasaportë bullgare false, të skaduar në vitin 2024, si edhe një kartë identiteti bullgare të vlefshme deri në vitin 2029, gjithashtu të falsifikuar.

Po ashtu, Mata përdorte edhe një kartë identiteti të Paraguajit, ku si vendlindje figuronte Mbretëria e Bashkuar. Ky dokument dyshohet se shërbente për të lëvizur më lehtësisht në shtetet e Amerikës Latine, ku ai kishte krijuar bazë veprimi mes Paraguajit dhe Brazilit.

Hetimet tregojnë se Mata shoqërohej me anëtarë të grupeve kriminale paraguajane, duke ngritur dyshime të forta për lidhje të drejtpërdrejta me rrjete ndërkombëtare të trafikut të drogës. Burime hetimore bëjnë me dije se ai mund të ketë jetuar për një periudhë në Paraguaj, ose të ketë lëvizur vazhdimisht mes vendeve të rajonit.

SPAK e shpalli Matën në kërkim në nëntor 2023, si pjesë e një grupi kriminal prej 11 personash, mes të cilëve edhe djali i ish-zyrtarit të policisë Erzen Breçani. Sipas hetimeve, grupi dyshohet se organizoi trafikimin e 250 kilogramëve kokainë nga Brazili drejt aeroportit të Frankfurtit në Gjermani, në fund të shtatorit 2020.

LEXO MË SHUMË

Kronikë

Arrestohet në Brazil Ervin Mata

Një operacion ndërkombëtar ka çuar në arrestimin e Ervin Matës në Brazil, një nga personat e shpallur në kërkim ndërkombëtar për trafik droge dhe përfshirje në organizatë kriminale.

21:02 1 ditë më parë27.04.2026.

Autori

Përveç trafikut të drogës, grupi akuzohet edhe për pastrim parash, si dhe për sigurim kushtesh për kryerjen e vrasjeve në Shqipëri.

Ervin Mata është emër i njohur për drejtësinë shqiptare edhe pas konfliktit të bujshëm në ish-Bllok në vitin 2018 me grupin e Ervis Martinajt, ngjarje që përfundoi me vrasjen e Fabian Gaxhës.

Autoritetet shqiptare pritet të ndjekin procedurat për ekstradimin e tij, ndërsa arrestimi konsiderohet një goditje e rëndësishme ndaj rrjeteve të trafikut ndërkombëtar të drogës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)