Ndryshimet ligjore në Kodin e Procedurës Penale, Bardhi: Rama po ngre mburojë për veten ndaj SPAK-ut

“Një mburojë për Kryeministrinë” përballë SPAK-ut! Kështu i ka cilësuar Gazment Bardhi propozimet e mazhorancës socialiste për ndryshime në Kodin e Procedurës Penale, vetëm pak pasi Gjykata Kushtetuese la në fuqi vendimin e Shkallës së Parë të GJKKO për pezullimin nga detyra si zv/kryeministre të Belinda Ballukut.

Në një postim në Facebook, Bardhi shprehet se Edi Rama qëllim final të strategjisë së mbrojtjes që PS po bën për Ballukun, ka shpëtimin e vetes nga pezullimi dhe arrestimi me urdhër të Prokurorisë së Posaçme.

“Për herë të parë “e besoj” Edi Ramën! E besoj kur thotë se ndryshimet në Kodin e Procedurës Penale nuk kanë lidhje me Belinda Ballukun. Sepse ai sot ndryshon ligjin për t’i vendosur Kryeministrit një mburojë plus nga SPAK-u. Edi Rama po propozon që Kryeministri të mos pezullohet nga detyra, nëse drejtësia gjykon se ai, për shembull, po prish provat e një hetimi. E besoj Edi Ramën, kur thotë se ka refuzuar tre herë dorëheqjen e Belinda Ballukut. Sepse qëllimi i tij nuk ka qenë kurrë të mbrojë Belindën, por veten e tij”, shkruan kreu i Grupit të PD.

Në vijim Bardhi shpjegon se “refuzimi i dorëheqjes nuk është më çështje luajaliteti, por është çështje precedenti”. Sipas numrit dy të demokratëve kreu i ekzekutivit po mendon të mbrojë veten, por për Bardhin as procedura nuk do ta shpëtojë nga drejtësia.

“Ndryshimi i Kodit të Procedurës Penale në mes të një hetimi penal aktiv për Zëvendëskryeministren nuk bëhet vetëm për sot. Bëhet për ditën kur drejtësia mund të trokasë më lart se numri dy i qeverisë. Prandaj, e besoj Edi Ramën, sepse ai po përpiqet të vendosë një imunitet të ri politik për veten nga SPAK-u. E besoj, sepse qëllimi i tij është personal. Ai do që funksioni i Kryeministrit të mos ndahet nga emri i Edi Ramës, pavarësisht provave të drejtësisë kundër tij. (Dhe çështja McGonigal është ende në hetim. Çështja e qendrimit të qeverisë për incineratorët është ende në hetim).

E besoj Edi Ramën, kur thotë se fillimisht do të votohet për imunitetin e Belinda Ballukut dhe më pas do të ndryshohet Kodi. E besoj, sepse ai sërish po mendon për veten. Po mendon se procedura do ta shpëtojë nga vijat e kuqe. Por vijat e kuqe nuk zhduken me procedurë. As me hi syve shqiptarëve, BE-së dhe SHBA-së”, shprehet Bardhi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)