Portieri francez i Bylisit braktis ndeshjen, Vora e kthen në stërvitore duelin e mbijetesës

Dueli për mbijetesë mes Vorës dhe Bylisit u shndërrua në një përballje pa histori për vendasit. Vora triumfoi bindshëm 4-1 në stadiumin “Selman Stërmasi”, në ndeshjen e vlefshme për javën e 18-të të Kategorisë Superiore.

Sfida u zhbllokua që në minutën e 10-të, kur Ruzgis përfitoi nga një gabim i prapavijës ballshiote dhe kaloi Vorën në avantazh. Në minutën e 24-t, një tjetër gafë fatale e portierit të Bylisit, Jérémy Vachoux, i cili tentoi të nisë aksionin shpejt, i dhuroi topin Gecit, që shënoi golin e dytë për vendasit.

Pas këtij momenti, nervozizmi i portierit francez u bë i dukshëm. Kulmi erdhi në minutën e 42-të, kur Vachoux vendosi të braktisë fushën e lojës në shenjë proteste, duke hequr dorezat dhe duke u drejtuar drejt vijës anësore, një skenë e rrallë për futbollin shqiptar. Arbitri Ermir Celaj e ndëshkoi 31-vjeçarin me karton të verdhë, ndërsa portieri hoqi edhe fanellën dhe u drejtua drejt dhomave të zhveshjes.

Bylisi u detyrua të aktivizojë portierin e dytë, Renato Beqaj, i cili u fut në lojë i papërgatitur dhe me vështirësi për t’u përshtatur.

Në pjesën e dytë, Ibrahim Mustapha shkurtoi diferencën për Bylisin, duke çuar shifrat në 2-1, por reagimi i Vorës ishte i menjëhershëm. Irgi Kasalla shënoi dy herë në minutat 77 dhe 81, duke vulosur fitoren e thellë 4-1 për skuadrën vendase.

Me këtë sukses, Vora ngjitet në kuotën e 19 pikëve, del nga zona e ftohtë e renditjes dhe zbret Bylisin në vendin e tetë të klasifikimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)