Joshua reagon për herë të parë pas aksidentit tragjik: Zoti më kishte vendosur pranë njerëzve të mëdhenj

Boksieri britanik Anthony Joshua ka reaguar për herë të parë pas aksidentit të rëndë automobilistik pranë Lagos, Nigeri, ku humbën jetën dy miqtë e tij të ngushtë, Sina Ghami dhe Latif “Latz” Ayodele. Ngjarja e rëndë ndodhi të hënën, kur automjeti me të cilin udhëtonin u përplas me një kamion të ndalur në një rrugë kryesore pranë qytetit.

Joshua, i cili ndodhej si pasagjer në automjet, mbeti i plagosur lehtë dhe u transportua me urgjencë në spital, ku mori ndihmën mjekësore. Ai ka konfirmuar se tashmë është kthyer në Mbretërinë e Bashkuar, pas pjesëmarrjes në ceremonitë mortore të dy miqve të tij.

Në një postim emocional në rrjetet sociale, Joshua ndau një fotografi bardh e zi të dy miqve, të shoqëruar nga figura simbolike të pëllumbave, dhe u shpreh falënderues për mbështetjen e treguar. “Nuk e kuptoja sa të veçantë ishin. Ecja me ta, qeshja me ta, pa e ditur se Zoti më kishte vendosur pranë njerëzve të mëdhenj,” shkroi ai, duke shtuar se dhimbja është e madhe, por edhe më e rëndë për prindërit e viktimave.

Reagimet nga komuniteti i boksit kanë qenë të shumta, me sportistë të njohur që i kanë shprehur solidaritet Joshua-s. Policia e shtetit Ogun konfirmoi se shoferi i automjetit është proceduar penalisht, ndërsa autoritetet po hetojnë shkaqet e sakta të aksidentit, të cilat përfshijnë një gomë të plasur dhe humbje kontrolli.

Anthony Joshua, i lindur në Angli nga prindër nigerianë, ndodhej me pushime në Nigeri pas fitores së tij të fundit ndaj Jake Paul dhe pritet të rikthehet në ring në muajt në vijim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)