Rekord podiumesh në Kupën e Afrikës, Nigeria si askush tjetër me medaljen e bronzit

Përfaqësuesja e Nigerisë vendosi një rekord historik në Kupën e Afrikës, duke u ngjitur për herë të 17-të në podium. Kjo është një arritje, të cilën nuk e ka realizuar asnjë skuadër tjetër e kontinentit afrikan.

“Shqiponjat” e siguruan vendin e tretë në këtë edicion të trofeut pas fitores 4-2 me penallti përballë Egjiptit. Ata triumfuan vetëm falë ekzekutimeve nga pika e bardhë, pasi ndeshja në stadiumin e Kazablankës në Marok, u mbyll në barazim pa gola gjatë kohës së rregullt.

Heroi i sfidës ishte portieri Stanley Nwabali, që falë paraqitjes vendimtare u shpall “Lojtari i Ndeshjes”, duke kontribuar në mënyrë të paçmueshme në suksesin e nigerianëve, pasi priti penalltitë e Mohammed Salah dhe Marmoush. Pas tre titujve kampionë të Afrikës, ata kanë qenë 5 herë nënkampionë, teksa në nëntë raste kanë siguruar shkallën e tretë të podiumit dhe medaljen e bronzit.

Edhe pse nuk arriti në finalen e madhe, Nigeria u konsiderua nga shumë ekspertë si skuadra më konstante e turneut. “Shqiponjat” fituan gjashtë ndeshje dhe pësuan vetëm një humbje, atë në gjysmëfinale ndaj organizatorëve të Marokut, që mbrëmjen e sotme luajnë finalen për trofeun me Senegalin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)