Një orë mbledhje me deputetët e Tiranës dhe zyrtarët e bashkisë, zbardhen porositë e Ramës

Rreth një orë ka zgjatur mbledhja që Kryeministri Edi Rama zhvilloi mesditën e sotme në selinë e Partisë Socialiste me deputetët e qarkut të Tiranës. Në takim morën pjesë edhe përfaqësues të Bashkisë së Tiranës, drejtues të njësive administrative dhe zyrtarë vendorë.

Sipas burimeve, diskutimet u përqendruan te organizimi i brendshëm i strukturave dhe angazhimi i deputetëve në terren. Fokusi kryesor i mbledhjes ishte koordinimi i punës mes deputetëve dhe përfaqësuesve të bashkisë, si dhe adresimi i çështjeve prioritare për qytetin e Tiranës.

Diskutimet janë fokusuar edhe te menaxhimi i punëve në Bashkinë e Tiranës, teksa Rama ka kërkuar rritje të vëmendjes ndaj problematikave që kërkojnë zgjidhje konkrete dhe prezencë më të shtuar pranë qytetarëve, në një kohë kur kryebashkiaku Erion Veliaj ndodhet prej më shumë se një viti në paraburgim.

Po ashtu, mësohet se është kërkuar angazhim maksimal për zhvillimin e takimeve me qytetarët, anëtarësinë dhe simpatizantët e PS-së, në kuadër edhe të përgatitjeve për zgjedhjet e brendshme.

Kujtojmë se të martën, Rama mblodhi kryesinë e PS-së në një takim me theks organizativ, ku kërkoi nisjen e një dialogu të drejtpërdrejtë me qytetarët.

Në përfundim të mbledhjes shefi i qeverisë u pa të largohej nga selia rozë në shoqërinë e Drejtoreshës së Autoritetit Kombëtar të Ushqimit, ish-ligjvënëses socialiste, Blerina Gjylameti. Rama ishte gjatë gjithë kohës duke komunikuar në telefon, ndërsa gjestikulacioni i kryeministrit tregonte për një bisedë intensive.

Komente (0)