Getafe merr 3 pikë në Madrid, siluri i Satrianos largon Realin nga kreu

Getafe arriti një fitore historike 1-0 ndaj Real Madrid në “Santiago Bernabéu”, duke marrë tri pikë në transfertë për herë të parë që nga viti 2008 dhe duke goditur ambiciet për titull të rivalëve madrilenë.

Edhe pse erdhën në këtë sfidë me mungesa të rëndësishme dhe me një seri të gjatë humbjesh në këtë stadium, miqtë treguan organizim të shkëlqyer dhe disiplinë.

Heroi i mbrëmjes ishte portieri David Soria, i cili me disa pritje vendimtare mbajti në lojë skuadrën e tij përballë presionit të vazhdueshëm të vendasve.

Golin e vetëm të takimit e realizoi Martín Satriano, duke shfrytëzuar një moment pasigurie në mbrojtjen e Realit dhe duke dërguar topin në rrjetë me një goditje spektakolare. Ishte një gol me peshë të madhe, pasi Getafe nuk kishte shënuar në pesë përballjet e fundit ndaj “Los Blancos”.

Në pjesën e dytë, Real Madrid u përpoq të reagojë, por hasi vështirësi për të çarë mbrojtjen e organizuar të kundërshtarit. Frustrimi i vendasve u reflektua edhe me një karton të kuq në fund.

Pas kësaj humbjeje, Reali mbetet katër pikë pas kryesuesve të Barcelonës, ndërsa Getafe largohet tetë pikë nga zona e rrezikut, duke hedhur një hap të rëndësishëm drejt mbijetesës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)