Jo vetëm ‘Dora e Zotit’, Maradona e shënoi golin epik me një fanelë false

Në Botërorin e vitit 1986 në Meksikë, para ndeshjes legjendare me Anglinë, Argjentina u përball me një problem të papritur. Sipas shortit, skuadra duhej të luante me fanellën e dytë, një model prej pambuku të trashë, i papërshtatshëm për vapën e madhe dhe lartësinë mbi 2 mijë metra në Mexico City.

Trajneri Carlos Bilardo e kuptoi menjëherë se lojtarët nuk mund të zbrisnin në fushë me ato fanella të rënda. Furnizuesi sportiv Le Coq Sportif nuk kishte kohë të sillte një version tjetër para ndeshjes.

Atëherë nisi kërkimi për një zgjidhje emergjente. Portieri i Argjentinës, Héctor Zelada, njihte mirë tregun e famshëm Tepito në Mexico City, një zonë e njohur për shitjen e mallrave jozyrtare. Magazinieri i ekipit shkoi atje dhe u kthye me disa fanella të lehta, pothuajse identike me origjinalet.

Thuhet se vetë Maradona zgjodhi modelin që do të përdorte skuadra në atë ndeshje historike.

Pikërisht me atë fanellë ai realizoi dy nga golat më të famshëm në historinë e futbollit: “Dora e Zotit” dhe “Goli i Shekullit”.

Vite më vonë, në vitin 2022, fanella e përdorur nga Maradona në atë sfidë u shit në ankand për rreth 8.8 milionë euro, duke u kthyer në një nga objektet sportive më të shtrenjta të shitura ndonjëherë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)