I çoi për herë të parë në Botëror, holandezi zgjedh familjen para futbollit

Pas arritjes historike me kualifikimin në Kupën e Botës 2026 që do të zhvillohet në SHBA, Kanada dhe Meksikë, Dick Advocaat ka dhënë dorëheqjen nga posti i trajnerit të kombëtares së Curaçaos. Lajmi është bërë i ditur nga Federata e Futbollit e këtij vendi, e cila konfirmoi se në krye të skuadrës do të vendoset një tjetër teknik holandez, Fred Rutten.

Veterani i pankinave shpjegoi se vendimi i tij lidhet me arsye familjare, pasi dëshiron të qëndrojë pranë vajzës së tij që po përballet me probleme shëndetësore.

“Gjithnjë kam thënë se familja vjen përpara futbollit. Bëhet fjalë për një vendim natyral. Do të më mungojë shumë Curaçao, njerëzit e tij dhe kolegët e mi. Jam krenar për futbollistët, stafin dhe anëtarët e Këshillit Administrativ që besuan te ne”, deklaroi Advocaat.

Nën drejtimin e tij, Curaçao arriti një sukses të jashtëzakonshëm duke u bërë vendi më i vogël në botë që siguron një biletë për fazën finale të një Botërori, një arritje që do të mbetet në historinë e futbollit të këtij shteti.

Tashmë sfida e madhe kalon në duart e Fred Rutten, i cili sjell me vete një përvojë të pasur nga pankinat evropiane. Ai ka drejtuar klube të njohura si FC Twente, PSV Eindhoven, Feyenoord dhe FC Schalke 04.

Federata beson se përvoja dhe qetësia e Rutten do të jenë thelbësore për të përgatitur ekipin për sfidën më të madhe në historinë e tij, atë të paraqitjes në Kupën e Botës 2026.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)