Tmerr në Romë, ylli i ekipit dhe familja e tij mbahen peng nga grabitësit e armatosur

Ka qenë një mbrëmje ferri ajo mes të hënës dhe të martës për futbollistin e Romës, Neil El Aynaoui dhe familjen e tij, të cilët ranë viktima të një grabitjeje të armatosur.

Sipas ANSA një bandë prej gjashtë personash të maskuar hyn në shtëpinë e tij në lagjen Castel Fusano të kryeqytetit italian gjatë natës dhe nën presionin e armës e mbajtën 24-vjeçarin, së bashku me familjen, të mbyllur në një dhomë gjatë bastisjes së rezidencës luksoze.

Grabitësit hynë me forcë nga dritarja e dhomës së ndenjes dhe më pas mbyllën mesfushorin maroken, nënën, të dashurën e tij, vëllain e tij dhe të dashurën e vëllait të tij në një dhomë, ndërsa bastisnin shtëpinë dhe u larguan nga aty me bizhuteri me vlerë rreth 10,000 euro, një Rolex dhe çanta të firmave luksoze.

Ngjarja ka ndodhur rreth orës 3 të mëngjesit. Sipas raportit të Corriere dello Sport, mesfushori 24-vjeçar dhe familja e tij u kapën në befasi në gjumë dhe më pas u tërhoqën zvarrë nga shtretërit e tyre.

"Duhet të heshtni", kërcënoi banda e armatosur, e cila më pas i mbylli të gjithë në një dhomë para se të kryente grabitjen e cila, bazuar në rrjedhën e ngjarjeve dhe dëshminë e lojtarit dhe gruas së tij, duket se ishte planifikuar me kujdes shumë kohë më parë.

Të gjashtë grabitësit ishin të veshur me të zeza, me doreza dhe me fytyrat e fshehura nën balaklava.

Oficerët nga njësia anti-grabitje e Skuadrës Mobile mbërritën menjëherë në vendngjarje dhe tani janë duke kërkuar banditët. Policia po ashtu ka mbledhur pamjet e kamerave të sigurisë nga zona përreth Infernettos.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)