Arrihet marrëveshja për shitjen e aktiviteteve të “TikTok” në SHBA

Pas viteve të tensioneve dhe negociatave, “TikTok” ka njoftuar shitjen e aktiviteteve të saj në Shtetet e Bashkuara te një grup investitorësh jo-kinezë. Ky moment shënon një pikë kthese të rëndësishme për të ardhmen e platformës.

Sipas njoftimit zyrtar, është krijuar një fond investimi i përbashkët me emrin “TikTok USDS”, ku pjesën kryesore e kontrollojnë tre kompani amerikane: Silver Lake, Oracle dhe MGX kanë secila nga 15 për qind të aksioneve. Ky hap i transferon drejtimin e platformës te kompani amerikane, duke i dhënë fund shqetësimeve mbi sigurinë e të dhënave personale dhe ndikimin e huaj në Amerikë.

Marrëveshja vjen pas një debati të gjatë që nisi në fund të vitit 2019 dhe u intensifikua në 2020-ën, me urdhrin ekzekutiv të Donald Trump, i cili kërkonte largimin e aplikacionit nga SHBA për arsye sigurie kombëtare. Nën administratën Biden, presioni vazhdoi deri në ligjin federal të prillit 2024, që caktoi ultimatum për shitjen e kompanisë deri më 19 janar 2025.

Gjatë mandatit aktual, Trump tregoi një qëndrim më të butë ndaj platformës, duke e konsideruar si një mjet të rëndësishëm komunikimi politik. Presidenti amerikan e ka përshëndetur marrëveshjen në “Truth Social”, duke e quajtur “shpëtim të TikTok” dhe falënderoi presidentin kinez Xi Jinping për bashkëpunimin.

“Do të jetë në duar të investitorëve amerikanë dhe do të vazhdojë të jetë një zë i rëndësishëm”, tha shefi i Shtëpisë së Bardhë. Marrëveshja shënon fillimin e një kapitulli të ri për “TikTok” në SHBA, duke e stabilizuar si një ent autonom, që funksionon në përputhje me rregullat dhe ligjet amerikane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)