Sulmohet autokolona amerikane në Siri, 3 të vrarë, Trump premton hakmarrje

Presidenti i Shteteve të Bashkuara, Donald Trump, paralajmëroi për hakmarrje pas sulmit në Siri ku humbën jetën dy trupa amerikane dhe një civil, në atë që mund të konsiderohet si incidenti i parë me viktima ndaj forcave amerikane që nga rrëzimi i ish-presidentit sirian Bashar Assad.

Sulmi ndodhi në pjesën qendrore të Sirisë dhe Uashingtoni ia atribuon përgjegjësinë grupit ekstremist Shteti Islamik.

Sipas Komandës Qendrore të SHBA, një sulmues i vetëm i lidhur me ISIS hapi zjarr në një pritë, duke plagosur gjithashtu tre anëtarë shërbimi amerikanë. Ushtria amerikane njoftoi se sulmuesi u vra. Pentagoni konfirmoi se civili i vrarë ishte një përkthyes amerikan që punonte me forcat e SHBA-së në operacionet kundër terrorizmit në rajon.

Trump deklaroi se sulmi ishte i drejtuar kundër SHBA dhe Sirisë dhe ndodhi në një zonë të rrezikshme që nuk kontrollohet plotësisht nga autoritetet siriane. Ai theksoi se presidenti sirian Ahmed al-Sharaa ishte i zemëruar nga ngjarja, duke nënvizuar se Siria po lufton përkrah trupave amerikane kundër ISIS-it.

Të shtënat ndodhën pranë qytetit historik të Palmirës. Sipas mediave shtetërore siriane, disa ushtarakë sirianë dhe amerikanë u plagosën dhe u transportuan me helikopter në një bazë pranë kufirit me Irakun dhe Jordaninë. Ka pasur raportime kontradiktore mbi identitetin e sulmuesit, por Ministria e Brendshme e Sirisë mohoi se ai ishte pjesë e forcave të sigurisë, duke theksuar se po zhvillohen hetime për të përcaktuar lidhjet e tij me ISIS.

Aktualisht, SHBA-ja mban ende qindra trupa në Sirinë lindore si pjesë e koalicionit kundër ISIS-it, ndërsa marrëdhëniet me Sirinë janë përmirësuar pas ardhjes në pushtet të al-Sharaas.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)