Stuhia e borës “gjunjëzon” SHBA, mijëra njerëz pa energji, probleme në aeroporte

Një stuhi masive dimërore ka shkaktuar probleme të mëdha në të gjithë Shtetet e Bashkuara, duke prekur mbi gjysmën e popullsisë së vendit.

Bora e dendur, shiu i ngrirë dhe akulli kanë paralizuar transportin ajror dhe rrugor, ndërsa temperaturat ekstreme në zero kanë rritur rrezikun për shëndetin dhe sigurinë publike.

Mbi 13 mijë fluturime janë anuluar në aeroportet kryesore, Dallas-Fort Ëorth, Chicago, Atlanta dhe Uashington, duke lënë qindra mijëra udhëtarë të bllokuar.

Rrugët kryesore janë bërë të pakalueshme për shkak të akullit, duke shkaktuar aksidente, dalje nga rruga dhe ndalim të transportit në disa shtete.

Ndërprerja e energjisë elektrike është një nga problemet më serioze. Qindra mijëra familje në Teksas, Luiziana dhe shtete të tjera jugore kanë mbetur pa energji, pasi akulli ka rrëzuar linjat elektrike.

Autoritetet paralajmërojnë se rikthimi i energjisë mund të zgjasë, pasi kushtet e motit po pengojnë punën e ekipeve të emergjencës.

Temperaturat ekstreme në Midëest dhe veri kanë arritur deri në minus 40 gradë Celsius, duke rritur rrezikun e ngricës brenda pak minutash. Personat e pastrehë dhe grupet vulnerabël janë veçanërisht të rrezikuar, ndërsa organizatat humanitare po përpiqen të ofrojnë ndihmë në kushte të vështira.

Institucionet arsimore kanë mbyllur shkollat dhe universitetet, shërbimet fetare janë zhvendosur online dhe aktivitetet publike janë anuluar, përfshirë paradat dhe eventet kulturore.

Zyrtarët paralajmërojnë se dëmet nga kjo stuhi, veçanërisht në zonat e mbuluara nga akulli, mund të jenë të krahasueshme me ato të një uragani dhe se pas stuhisë pritet një valë e re moti të keq.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)