Arrestohet lideri i bandës së frikshme në Ekuador, vrau edhe kandidatin për president

Një nga drejtuesit e një prej bandave më të mëdha të trafikut të drogës në Ekuador është arrestuar një ditë më parë në New Mexico.

Bëhet fjalë për Ángel Esteban Aguilar Morales, i njohur me pseudonimin “Lobo Menor”. Ai kërkohej për përfshirje në vrasjen e kandidatit për president, Fernando Villavicencio, në vitin 2023.

Ministri i Brendshëm i Ekuadorit, John Reimberg tha se i arrestuari kishte siguruar dokumente të rreme kolumbiane për t’u fshehur. Ndërkohë, ministri i Sigurisë së Meksikës, Omar García Harfuch, deklaroi se ai ishte në kërkim ndërkombëtar nga Interpol për trafik droge, zhvatje dhe vrasje.

Edhe presidenti i Kolumbi, Gustavo Petro, e cilësoi Morales si “një nga vrasësit më të rrezikshëm në botë”.

Arrestimi u krye gjatë një operacioni të përbashkët mes autoriteteve të Meksikës, Ekuadorit dhe Kolumbisë, duke u konsideruar një goditje e fortë ndaj krimit të organizuar ndërkombëtar.

Fernando Villavicencio u vra në gusht 2023 në kryeqytetin Kuito, pasi doli nga një takim elektoral. Për këtë ngjarje, disa anëtarë të bandës Los Lobos janë dënuar më parë.

Banda “Los Lobos” konsiderohet një nga grupet më të rrezikshme kriminale në Ekuador dhe ka lidhje me kartelin e fuqishëm meksikan Jalisco New Generation Cartel.

Ekuadori është kthyer në një pikë kyçe për trafikun ndërkombëtar të drogës, për shkak të pozicionit mes Kolumbi dhe Peru, dy nga prodhuesit më të mëdhenj të kokainës në botë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)