500 shtëpi të shkatërruara dhe mijëra njerëz pa energji, 14 tornado shkatërrojnë Misisipin

Stuhitë e fuqishme që përfshinë shtetin amerikan të Misisipit gjatë mbrëmjes së së mërkurës kanë shkaktuar shkatërrime të mëdha dhe një situatë emergjente në disa qarqe, ku autoritetet raportojnë për të paktën 14 tornado të regjistruara brenda një nate.

Sipas autoriteteve lokale dhe shërbimeve të emergjencës, rreth 500 banesa janë shkatërruar ose dëmtuar rëndë nga stuhitë, duke lënë qindra familje pa strehë dhe duke shkaktuar dëme të konsiderueshme në infrastrukturën publike.

Erërat ekstreme kanë rrëzuar pemë të mëdha, kanë dëmtuar linjat e energjisë elektrike dhe kanë bllokuar akset rrugore, duke vështirësuar ndërhyrjen e ekipeve të shpëtimit.

Në Lincoln County, situata paraqitet veçanërisht e rënduar. Një fëmijë 1-vjeçar rezulton i zhdukur pas kalimit të stuhive, ndërsa të paktën 17 persona janë raportuar të plagosur, disa prej tyre me dëmtime serioze.

Në zonën e Bogue Chitto, banorë të bllokuar në banesa të dëmtuara kanë përjetuar momente paniku, pasi pemët e rrëzuara kanë goditur automjetet dhe strukturat e banimit.

Shërbimi Meteorologjik Kombëtar bëri me dije se një tornado e madhe dhe e rrezikshme ka lëvizur nga Lincoln County drejt Lawrence County, ndërsa ekipet e emergjencës vijojnë vlerësimet në terren.

Guvernatori i Mississippi-t ka bërë thirrje për solidaritet dhe kujdes maksimal, duke u kërkuar qytetarëve të shmangin zonat e goditura për të mos penguar punën e ekipeve të emergjencës.

Ndërkohë, parashikimet meteorologjike tregojnë se rreziku i stuhive të forta dhe tornadove mbetet i lartë edhe në Alabama, Georgia dhe Florida, si dhe në pjesë të Carolinave dhe Texasit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)