Bota është e zhytur në borxh, debiti global arrin shifrën rekord prej 353 mijë miliardë dollarë

Bota ka arritur një nivel historik të borxhit, me shifrën totale që kap gati 353 mijë miliardë dollarë, sipas raportit Global Debt Monitor të Institutit Ndërkombëtar të Financave. Ky nivel përfaqëson më shumë se tre herë prodhimin ekonomik vjetor të të gjithë planetit. Sipas të dhënave, në vetëm një vit borxhi global është rritur me rreth 25 mijë miliardë dollarë, ndërsa në tre muajt e parë të vitit 2026 janë shtuar edhe 4.400 miliardë të tjera. Rritja e vazhdueshme ka vijuar për më shumë se tre vite, pa shenja ngadalësimi.

Për ta bërë më të kuptueshme këtë shifër, ekonomistët theksojnë se prodhimi i përgjithshëm botëror vlerësohet rreth 105 mijë miliardë dollarë. Kjo do të thotë se borxhi global është afërsisht 3.5 herë më i madh se gjithë pasuria që krijohet gjatë një viti në planet. Për shtete të mëdha si Spanja apo Italia, borxhi botëror është i barabartë me rreth 175 vite të gjithë pasurisë që ato prodhojnë.

Me fjalë të tjera, nëse të gjitha vendet e botës do të ndalonin shpenzimet dhe do të përdornin çdo qindarkë vetëm për të shlyer borxhet, do të duheshin më shumë se tre vjet për ta mbyllur këtë “gropë” detyrimesh financiare. Nëse kjo shifër ndahet për çdo banor të tokës, duke përfshirë edhe të porsalindurit, rezulton se çdo person “mbart” mesatarisht rreth 44 mijë dollarë borxh.

Borxhi përfshin detyrimet e të gjitha shteteve, bizneseve, bankave dhe familjeve. Qeveritë financojnë shërbimet publike përmes huamarrjes, kompanitë marrin kredi për investime, bankat japin dhe marrin hua, ndërsa familjet përdorin kredi për shtëpi dhe konsum. Rritja e fortë e borxhit u përshpejtua ndjeshëm gjatë pandemisë së COVID-19, kur shtetet rritën shpenzimet publike për të mbështetur ekonomitë dhe qytetarët, në një periudhë me norma interesi shumë të ulëta.

Edhe pas pandemisë, niveli i borxhit ka vazhduar të rritet, i ndikuar edhe nga konfliktet dhe pasiguritë gjeopolitike. Sipas raportit, raporti i borxhit ndaj prodhimit botëror ka mbetur rreth 305%, që do të thotë se për çdo dollar pasuri të krijuar, ekzistojnë rreth tre dollarë borxh në nivel global.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)