Rusia zhvendos sulmet në rajonin kyç të Ukrainës, goditet qyteti port i Odesës

Rusia ka shtuar ndjeshëm sulmet ajrore dhe raketore ndaj rajonit jugor ukrainas të Odesës, duke shkaktuar ndërprerje të mëdha të energjisë elektrike dhe duke vënë në rrezik serioz infrastrukturën portuale dhe detare të zonës. Zëvendëskryeministri i Ukrainës, Oleksiy Kuleba, deklaroi se Moska po kryen sulme “sistematikë”, ndërsa paralajmëroi se fokusi i luftës mund të jetë zhvendosur drejt Odesës.

Presidenti Volodymyr Zelensky tha se këto sulme synojnë të bllokojnë aksesin e Ukrainës në logjistikën detare, duke goditur një nga pikat më jetike për ekonominë e vendit. Vetëm të hënën në mbrëmje, sulmet ruse dëmtuan infrastrukturën portuale në Odesa dhe një anije civile, sipas autoriteteve lokale.

Në ditët e fundit, qindra sulme kanë shkaktuar ndërprerje të vazhdueshme të energjisë, duke lënë pa drita mbi 120 mijë banorë, si dhe viktima civile. Një sulm me raketë balistike në portin Pivdenniy vrau tetë persona dhe plagosi dhjetëra të tjerë, ndërsa një tjetër sulm shkatërroi urën e vetme që lidh rajonin e Odesës me Moldavinë.

Odesa mbetet porti më strategjik i Ukrainës, pasi portet e tjera janë të bllokuara nga pushtimi rus. Që nga gushti 2023, qyteti është pika kryesore e eksportit të drithërave përmes një korridori detar përgjatë brigjeve të Rumanisë dhe Bullgarisë.

Zelensky theksoi se pa presion ndërkombëtar ndaj Rusisë, Moska nuk ka asnjë synim real për t’i dhënë fund agresionit. Deklaratat vijnë në një kohë kur përpjekjet diplomatike të udhëhequra nga SHBA nuk kanë sjellë ende përparim konkret drejt përfundimit të luftës, e cila po hyn në vitin e saj të katërt.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)