Akuzat ndaj princit Andrew: Shpenzoi paratë e taksapaguesve për masazhe dhe udhëtime

Princi Andrew, vëllai i Mbretit Charles III, është rikthyer në qendër të vëmendjes për shpenzime të dyshimta të parave publike. Sipas raportimeve të BBC-së, ish-zyrtarë të lartë të qeverisë britanike pretendojnë se Andrew ka marrë rimbursime në vlerën e mijëra paund për masazhe, si edhe dhjetëra mijëra paund për udhëtime gjatë kohës që shërbente si përfaqësues special për tregtinë britanike gjatë viteve 2001 deri më 2011.

Duke folur në kushte anonimiteti, një ish-zyrtar rrëfeu se shpesh është përballur me shpenzime jashtëzakonisht të larta dhe ka refuzuar disa herë rimbursimin e kostove për “shërbime masazhesh”. Megjithatë, ai tha se drejtuesit e ministrisë nuk e kanë marrë parasysh refuzimin dhe shuma i është paguar princit Andrew nga fonde publike. Sipas ish-zyrtarit, kjo ka mjaftuar që të krijohet ajo që e përshkruan si “kulturë nënshtrimi” ndaj anëtarit të familjes mbretërore.

Një tjetër burim i BBC-së konfirmoi se ka shqyrtuar disa herë kërkesat për rimbursim të udhëtimeve të Andrew, duke përfshirë këtu fluturimet, hotelet dhe pagat e shoqëruesve të tij. Në shumë raste nuk ishte e qartë sa persona ishin realisht pjesë e grupeve të shoqërimit.

Burimi tha se nuk ka “asnjë dyshim” për vërtetësinë e akuzave, duke nënvizuar se shumat e shpenzuara dukeshin të ekzagjeruara dhe jo personale. Këto akuza të reja vijnë ndërsa ish-Duka i Jorkut është nën hetim për lidhjen e tij me financuesin pedofil Jeffrey Epstein. Kohët e fundit ai u arrestua dhe më pas u la i lirë, ndërsa autoritetet vazhdojnë të bastisin banesën e tij për të mbledhur prova shtesë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)