“Me Zotin përpara dhe PS-në në krye”, Rama nga Gjirokastra: Opozita do na kishte penguar integrimin në BE

Gjatë turit “Punët e Shqipërisë”, nga Gjirokastra kryeministri Edi Rama është ndalur te procesi i integrimit të vendit në Bashkimin Europian, duke vlerësuar rolin e shumicës parlamentare në këtë proces. Rama u shpreh se, nëse Partia Socialiste nuk do të kishte numrin aktual të deputetëve në Kuvend, Shqipëria nuk do të ishte në fazën e negociatave me BE-në.

“Nëse ne nuk do t’i kishim ato vota në Parlament, sot nuk do kishim negociata me BE-në, por do kishim presion për të bërë negociata me palavitë që kemi në opozitë, se do na kishin marrë peng në emër të integrimit”, deklaroi Rama. Ai kujtoi gjithashtu fushatën e fundit parlamentare, duke theksuar se kërkesa e tij kryesore ka qenë një mandat më i fortë për të çuar përpara procesin e integrimit.

“Nuk doja më shumë karrige në Parlament, por që të mos lejonim që ky proces të merrej peng nga dikush dhe për ta çuar deri në fund këtë mision historik”, tha kryeministri. Ai foli edhe për nevojën për të luftuar dezinformimin dhe për të mbrojtur arritjet e qeverisë në procesin e integrimit, duke theksuar se Shqipëria ndodhet “në pikën më të mirë të saj ndonjëherë”.

“Ne nuk jemi një forcë politike pa të meta, por nuk duhet të lejojmë askënd të mbulojë me baltë punën e bërë”, shtoi Rama. Në përmbyllje të fjalës së tij, ai u shpreh: “Me Zotin përpara dhe PS-në në krye”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)