Vdekja e dy të miturve në aksident, protestë e heshtur para bashkisë së Durrësit

Dhjetëra qytetarë, familjarë dhe banorë të zonës u mblodhën mbrëmjen e sotme përpara Bashkisë së Durrësit në një protestë të heshtur, në kujtim të dy fëmijëve që humbën jetën në një aksident tragjik ditën e dielë.

Të veshur me të zeza, pjesëmarrësit ndezën qirinj në shkallët e institucionit, duke nderuar viktimat dhe duke kërkuar më shumë masa sigurie në zonat e banuara.

Tubimi u zhvillua pa deklarata për mediat, ndërsa heshtja u kthye në një formë simbolike proteste ndaj institucioneve vendore.

Për disa minuta u bllokua edhe qarkullimi në rrugën qendrore të qytetit, ndërsa qytetarët kërkuan reagim të menjëhershëm për përmirësimin e infrastrukturës dhe rritjen e sigurisë rrugore.

Reagimi i sotëm vjen pas një tjetër akti simbolik të zhvilluar më herët gjatë ditës, kur pranë Drejtorisë së Policisë u vendos një kurorë me lule me mesazhin “Merrni masa”.

Ngjarja e rëndë ndodhi kur Nikoll Radaçi, i cili dyshohet se drejtonte mjetin në gjendje të dehur, përplasi tre fëmijë që po luanin në trotuar. Si pasojë, humbën jetën Kles Nikolli, 9 vjeç dhe Enea Muçaj, 12 vjeç, ndërsa Arbjon Meslani, 8 vjeç, ndodhet në gjendje të rëndë në Spitalin e Traumës në Tiranë.

Sipas të dhënave, automjeti u përplas edhe me një mjet tjetër të parkuar para se të ndalonte.

Familjarët dhe banorët, ende të tronditur, kërkojnë masa konkrete nga autoritetet për të parandaluar tragjedi të ngjashme në të ardhmen. Ndërkohë, një marshim më i madh proteste është paralajmëruar për ditën e nesërme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)