Kompania ajrore refuzon të kompensojë me 890 euro pasagjerin, Austria i sekuestron avionin

Një vendim i paprecedentë është marrë nga një gjykatë në Linz të Austrisë. Gjykata vendosi të sekuestrojë një avion me vlerë dhjetëra milionë euro, në pronësi të Ryanair, pasi kompania irlandeze refuzoi të paguante 890 euro si kompensim për një pasagjere.

Avioni u vendos nën sekuestro në aeroportin e Linzit, rreth 200 kilometra larg Vjenës. Sipas raportimeve të mediave austriake, aeroplani i Ryanair u sekuestrua si masë paraprake pasi kompania nuk arriti të rimbursonte një pasagjere për një fluturim që mbërriti disa orë me vonesë.

Ngjarja që çoi palët në gjyq ndodhi në korrik 2024, kur pasagjerja dhe dy shoqëruesit e saj kishin planifikuar të fluturonin nga Linzi për në Palma de Mallorca. Megjithatë, fluturimi u nis disa orë më vonë dhe sipas rregulloreve evropiane, pasagjerja kishte të drejtë për një rimbursim prej 250 eurosh për person plus diferencën për një fluturim alternativ më të shpejtë, por linja ajrore irlandeze rimbursoi vetëm biletën origjinale.

Gruaja më pas e çoi Ryanair në gjykatë, e cila vendosi në favor të saj. Pavarësisht vendimit të favorshëm, linja ajrore nuk arriti të paguante kompensimin e kërkuar nga magjistratët, siç konfirmoi avokati i gruas.

“Ne e paditëm Ryanair, por ata nuk paguan asgjë”, tha avokati Georg Wageneder. Për të marrë pagesën, siç raportohet nga agjencia e lajmeve LaPresse, firma ligjore kërkoi ndërhyrjen e një përmbaruesi gjyqësor, i cili e ndaloi avionin e Ryanair të ulej në Hoersching, duke vendosur të ashtuquajturin "Kuckuck-Pickerl", një vulë që tregonte masën paraprake mbi të.

Avioni mund të fluturojë ende, por avokati shpjegoi se nëse Ryanair nuk arrin të paguajë shumën që i detyrohet, avioni mund të nxirret në ankand për të rikuperuar shumën e kërkuar, edhe pse avioni vlen disa milionë euro.

Ryanair në krahun tjetër mohon sekuestrimin dhe deklaron se “kjo nuk është e vërtetë”.

“Asnjë nga avionët tanë nuk është sekuestruar. Të gjitha raportet që thonë të kundërtën janë faktikisht të pasakta", deklaron kompania ajrore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)