Gjenerali rus kritikon Putin: Fillo e lufto seriozisht, e ardhmja në rrezik

Një nga ish-figurat më të larta ushtarake në Rusi ka dalë hapur me kritika të forta ndaj presidentit Vladimir Putin për mënyrën si po menaxhohet lufta në Ukrainë.

Ish-shefi i Shtabit të Përgjithshëm rus, Yuri Baluyevsky, i cili ka shërbyer edhe si zëvendësministër i Mbrojtjes, deklaroi se dobësia e udhëheqjes aktuale po vë në rrezik të ardhmen e vendit.

Në një fjalim në Dhomën Publike të Rusisë, ai theksoi se është koha që Kremlini “të fillojë të luftojë seriozisht”.

Baluyevsky kritikoi gjithashtu mënyrën se si Rusia ka promovuar armët e saj hipersonike, duke thënë se propaganda për superioritetin ushtarak nuk ka sjellë më shumë siguri për vendin.

“Ne kemi zhvilluar të parët armët hipersonike, por vetëm jemi mburrur me to, pa përmirësuar realisht sigurinë”, u shpreh ai.

Gjenerali në pension, 79 vjeç, akuzoi gjithashtu Putinin për mungesë reagimi ndaj disa sulmeve ukrainase, përfshirë një incident të vitit 2023 që synoi zonat pranë Kremlinit dhe një tjetër ndaj avionëve ushtarakë rusë.

Këto deklarata konsiderohen të rralla, pasi kritikat e hapura ndaj udhëheqjes ruse nga figura të larta ushtarake janë të pazakonta.

Ato vijnë në një moment kur lufta në Ukrainë vazhdon të jetë një nga sfidat më të mëdha për Rusinë në vitet e fundit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)