Taksa për sheqerin që po përplas politikën me industrinë në Gjermani

Në Gjermani është ndezur një debat i fortë rreth mundësisë së vendosjes së një takse mbi pijet me sheqer, një masë që ka ndarë politikën, industrinë ushqimore dhe organizatat e konsumatorëve.

Sipas një drafti të Ministrisë së Shëndetësisë, e ashtuquajtura “sugar tax” mund të hyjë në fuqi në vitin 2028 dhe pritet të gjenerojë rreth 450 milionë euro në vit. Këto të ardhura do të përdoren për të mbështetur sistemin publik shëndetësor dhe programe të parandalimit.

Organizatat për mbrojtjen e konsumatorëve e kanë pritur pozitivisht këtë propozim. Ato theksojnë se një taksë e tillë mund të ndikojë në uljen e konsumit të sheqerit dhe të ndihmojë në përmirësimin e shëndetit publik, sidomos te fëmijët dhe të rinjtë. Sipas tyre, për të qenë më efektive, masa duhet të përfshijë edhe pijet me ëmbëlsues artificialë, në përputhje me rekomandimet ndërkombëtare shëndetësore.

Në anën tjetër, industria ushqimore e kundërshton fort këtë nismë. Përfaqësues të saj argumentojnë se qëllimi i vërtetë është mbushja e boshllëqeve në buxhetin e shtetit dhe jo mbrojtja e shëndetit të qytetarëve. Ata paralajmërojnë gjithashtu për pasoja ekonomike për bizneset dhe konsumatorët.

Edhe në politikë, mendimet janë të ndara. Disa figura konservatore e mbështesin taksën, duke theksuar lidhjen mes konsumit të lartë të sheqerit dhe rritjes së obezitetit, veçanërisht tek të rinjtë. Të tjerë, megjithatë, e konsiderojnë atë si një masë të gabuar dhe kërkojnë që qeveria të fokusohet në reforma më të gjera ekonomike, si ulja e taksave për bizneset.

Ndërkohë, qeveria gjermane po shqyrton edhe masa të tjera për të përmirësuar financat publike, përfshirë rritjen e akcizave për alkoolin dhe duhanin, si dhe forcimin e luftës kundër evazionit fiskal.

Projektligji për taksën mbi pijet me sheqer pritet të diskutohet në Parlament në muajt në vijim, ku do të vendoset nëse kjo nismë do të bëhet realitet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)