Kapet kokaina me vlerë 800 milionë euro, 23 persona të arrestuar

Policia spanjolle ka sekuestruar një sasi rekord prej 27 tonë kokainë në një operacion të zhvilluar pranë Ishujve Kanarie, duke shënuar konfiskimin më të madh të këtij lloji në Evropë.

Operacioni u krye nga njësia elitare e Guardia Civil, e cila ndaloi një anije 90 metra të gjatë me emrin Arconian, e regjistruar në Ishujt Komoros.

Sipas autoriteteve spanjolle, në bordin e anijes u gjetën 27,215 kilogramë kokainë, me një vlerë të vlerësuar mbi 800 milionë euro. Gjatë kontrollit u sekuestruan gjithashtu armë zjarri dhe municione.

Gjykata e Lartë në Spanjë bëri të ditur se 23 anëtarët e ekuipazhit janë arrestuar dhe mbahen në paraburgim pa të drejtë lirimi me kusht. Mes tyre kishte shtetas nga Filipinet, Holanda dhe Surinami.

Hetuesit spanjollë, në bashkëpunim me autoritete amerikane dhe holandeze, dyshojnë se droga ishte destinuar për t’u futur në Spanjë përmes gomoneve me shpejtësi të lartë.

Ky sekuestrim thyen rekordin e mëparshëm evropian prej 22.7 tonësh të kapur në Hamburg në vitin 2024 dhe gjithashtu tejkalon rekordin e Spanjës, që ishte 11.8 ton kokainë e gjetur në një ngarkesë me banane në portin e Algeciras.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)