“Depozitat e naftës në shënjestër”, BBC: Sulme iraniane në Irak, Bahrein dhe Oman

Sulmet e vazhdueshme të Iranit kanë shkaktuar një sërë zjarresh në rajonin e Gjirit Persik, sipas raportimeve të BBC. Situata është përshkallëzuar pas goditjeve ndaj disa objekteve energjetike dhe anijeve, duke krijuar shqetësim të madh për sigurinë në zonë.

Në Irak, dy anije cisternë me naftë u përfshinë nga flakët pas një sulmi pranë portit jugor të Basrës. Ndërkohë në Bahrein është raportuar një zjarr i madh, pasi objektiv i sulmeve iraniane u bënë depozitat e naftës dhe karburantit pranë aeroportit ndërkombëtar. Sipas BBC, tymi i dendur ka mbuluar zonën dhe autoritetet u kanë bërë thirrje banorëve të mbajnë dritaret e shtëpive të mbyllura për arsye sigurie.

Situatë e tensionuar raportohet edhe në Oman, ku ekipet e zjarrfikësve vijojnë përpjekjet për të vënë nën kontroll një zjarr në depozitat e karburantit, pas sulmit të ndodhur një ditë më parë në portin e Salalah. Flakët kanë shkaktuar dëme të konsiderueshme në zonën e magazinimit të karburanteve.

Si masë paraprake, autoritetet e Omanit kanë urdhëruar evakuimin e anijeve që ndodheshin pranë terminalit të eksportit të naftës. Vendimi është marrë për të shmangur rrezikun e incidenteve të tjera, ndërsa tensionet në rajon vijojnë të mbeten të larta.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)