Evropa dhe Kina lëshojnë me sukses satelitin SMILE, do të studiojë ndikimin e Diellit mbi Tokën

Një nga projektet më të rëndësishme ndërkombëtare në fushën e kërkimeve hapësinore ka hyrë në fazën operative, pasi misioni i përbashkët europiano-kinez SMILE u lëshua me sukses nga qendra hapësinore europiane në Guajanën franceze me raketën Vega-C.

Misioni zhvillohet nga Agjencia Evropiane e Hapësirës dhe Akademia Kineze e Shkencave, me synimin për të studiuar ndërveprimin mes erës diellore dhe fushës magnetike të Tokës.

Sateliti SMILE do të mundësojë për herë të parë vëzhgim të vazhdueshëm global të magnetosferës së Tokës, mburojës natyrore që mbron planetin nga grimcat e ngarkuara dhe rrezatimi që vjen nga Dielli.

Shkencëtarët besojnë se të dhënat e këtij misioni do të ndihmojnë në kuptimin më të mirë të fenomenit të njohur si “moti hapësinor”, i cili mund të ndikojë në satelitë, sisteme GPS, komunikime radiofonike dhe rrjete energjetike në Tokë.

Anija hapësinore është e pajisur me katër instrumente shkencore kryesore, mes tyre një teleskop me rreze X dhe një sensor ultravjollcë me ndjeshmëri të lartë. Këto pajisje do të regjistrojnë në detaje përplasjen e grimcave diellore me fushën magnetike të Tokës.

Foto: ESA/ESA-M. Pédoussaut

Një fokus i veçantë do t’i kushtohet edhe studimit të aurorave polare dhe ndryshimeve në magnetosferë gjatë stuhive të forta diellore.

Sipas ESA-s, sateliti do të operojë në një orbitë shumë të zgjatur, mbi 120 mijë kilometra larg hemisferës veriore, duke lejuar vëzhgime të pandërprera për disa ditë me radhë.

Misioni SMILE është rezultat i një bashkëpunimi shumëvjeçar mes Europës dhe Kinës në kërkimet kozmike. Projekti nisi zyrtarisht në vitin 2016 dhe përfshiu mbi 250 shkencëtarë e studiues. Kohëzgjatja e planifikuar e misionit është rreth tre vite.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)