Një gotë qumësht në ditë ul rrezikun e goditjes në tru deri në 10%

Një gotë qumësht në ditë mund të ulë ndjeshëm rrezikun e goditjes në tru, sugjeron një studim i ri shkencor. Sipas kërkimit të publikuar në revistën Nutrients, konsumimi i rreth 180 gramëve qumësht në ditë, afërsisht një gotë mesatare, lidhet me një ulje të rrezikut për goditje në tru deri në 10 për qind.

Studimi është realizuar nga studiues japonezë, të cilët analizuan të dhëna për persona të moshës 30 deri në 79 vjeç. Në vend që të ndiqnin pacientë realë, ata ndërtuan një model simulimi 10-vjeçar për të parashikuar ndikimin e rritjes së konsumit të qumështit në popullatë. Sipas përllogaritjeve, nëse konsumi i qumështit rritet në nivelin e rekomanduar, rreziku i përgjithshëm për goditje në tru mund të bjerë me rreth 7 për qind në një dekadë, ndërsa në disa grupe arrin deri në 10.6 për qind.

Pa ndryshim në dietë, parashikohet që në Japoni të ndodhin rreth 1.76 milion raste goditjeje në tru në 10 vite, me mbi 267 mijë vdekje. Megjithatë, rritja e konsumit të qumështit mund të parandalojë mbi 123 mijë raste dhe rreth 18 mijë vdekje gjatë së njëjtës periudhë.

Ekspertët theksojnë se përfitimet lidhen me përbërjen e pasur ushqyese të qumështit, i cili përmban kalcium, kalium dhe magnez, minerale që ndihmojnë në rregullimin e tensionit të gjakut dhe përmirësimin e qarkullimit. Përveç kësaj, qumështi është burim i rëndësishëm i proteinave cilësore, vitaminës B12 dhe jodit, duke kontribuar në shëndetin e përgjithshëm.

Megjithatë, studimi nuk dallon mes llojeve të qumështit. Kërkime të mëparshme sugjerojnë se qumështi me pak yndyrë mund të ketë efekt më mbrojtës krahasuar me atë me yndyrë të lartë. Studiuesit theksojnë se konsumimi aktual në Japoni mbetet i ulët, duke lënë hapësirë për përmirësime në dietë dhe përfitime potenciale për shëndetin publik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)