Adoleshenti nxjerr nga lumi një “përbindësh” 65 kilogramë

Një adoleshent vetëm 14-vjeçar ka habitur peshkatarët në Spanjë pasi arriti të kapte një peshk gjigant në lumin Ebro, një prej më të mëdhenj që janë nxjerrë së fundmi nga këto ujëra. I riu arriti të nxjerrë nga lumi një “përbindësh” me gjatësi 2.15 metra dhe peshë mbi 65 kilogramë, pas një beteje që zgjati rreth 20 minuta.

Sipas mediave spanjolle, djali kishte dalë për peshkim së bashku me mikun e tij Rubén, ndërsa kishin kaluar gjithë paraditen pranë lumit. Askush nuk e kishte imagjinuar se aventura e tyre do të përfundonte me një kapje kaq të rrallë dhe spektakolare.

Babai i të riut, Jorge Alonso, tregoi se pasioni për peshkimin është trashëguar në familje. Fillimisht, ai ishte mësuar nga gjyshi, ndërsa më pas kishte nisur të praktikonte peshkimin me të atin. Nga peshqit e vegjël dhe troftat, adoleshenti kishte kaluar gradualisht tek silurët, të cilët njihen për madhësinë dhe forcën e tyre të jashtëzakonshme.

Lufta për nxjerrjen e peshkut ishte tepër e vështirë. Për ta larguar nga uji, adoleshentit iu desh të hynte vetë në lumë, ndërsa në ndihmë i erdhën miku i tij dhe disa kalimtarë të rastit. Në momentin që arriti ta nxirrte plotësisht në breg, ai nuk i mbajti dot lotët nga emocionet.

Këta peshq janë kthyer në një prej atraksioneve kryesore të lumit Ebro, ku muajt e fundit janë kapur disa ekzemplarë gjigantë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)