Mashtrimet me votat në Kosovë, policia shoqëron 100 komisionerë në Prizren

Policia e Kosovës, në bashkëpunim me Prokurorinë Themelore në Prizren, po zhvillon një operacion në rajonin e Prizrenit lidhur me dyshimet për keqpërdorim dhe manipulim të votave në zgjedhjet e 28 dhjetorit.

Lajmi është konfirmuar nga zëdhënësja e Policisë së Kosovës, major Luljeta Mehmeti, e cila ka theksuar se për momentin nuk mund të jepen detaje shtesë. “Për detajet e këtij operacioni do të njoftoheni në përfundim të tij”, ka deklaruar Mehmeti.

Sipas raportimeve të para, më shumë se 100 zyrtarë të angazhuar nga Komisioni Qendror i Zgjedhjeve janë marrë për intervistim në kuadër të këtij rasti.

Zhvillimin e aksionit e ka konfirmuar edhe Prokuroria Themelore në Prizren. Zëdhënësja e institucionit, Fitore Mehmeti ka bërë të ditur se hetimet janë në proces.

“Mund ta konfirmoj se është duke u zhvilluar një aksion lidhur me dyshimet për manipulim me vota. Për momentin nuk mund të japim detaje tjera pasi rasti është në procedurë”, ka thënë ajo.

Ndërkohë, Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”. Sipas aktakuzës, një person me inicialet M.A. dyshohet se ka dëmtuar dokumente zgjedhore në një qendër votimi në Shtime.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)