PZAP rrëzon vendimin e KQZ për Listën Serbe: I pajustifikuar

Paneli Zgjedhor për Ankesa dhe Parashtresa ka vendosur në favor të Listës Serbe, duke aprovuar ankesën e saj kundër Komisionit Qendror të Zgjedhjeve, i cili kishte vendosur të mos e përfshijë listën e kandidatëve të këtij subjekti në shpalljen e rezultateve për zgjedhjet parlamentare të 28 dhjetorit.

Sipas PZAP, veprimi i KQZ-së nuk ka bazë ligjore dhe është në kundërshtim me dispozitat që rregullojnë procesin zgjedhor. Paneli thekson se rezultatet përfundimtare të zgjedhjeve mund të shpallen vetëm pasi të përfundojnë të gjitha procedurat e numërimit dhe rinumërimit për çdo subjekt politik, pa bërë përjashtime.

PZAP vlerëson se shpallja selektive e rezultateve cenon barazinë e subjekteve zgjedhore, sigurinë juridike dhe transparencën e procesit, duke theksuar se një praktikë e tillë bie ndesh edhe me standardet ndërkombëtare, përfshirë ato të Komisionit të Venecias.  

Lista Serbe e përshëndeti vendimin, duke e cilësuar atë si konfirmim të sundimit të ligjit dhe të vullnetit të qytetarëve që e kanë mbështetur këtë subjekt politik. Nga kjo parti u kërkua që institucionet përgjegjëse ta zbatojnë vendimin pa vonesa dhe pengesa.

Vendimi i KQZ  nxiti reagime edhe nga faktori ndërkombëtar. Shtetet e Bashkuara e cilësuan atë si të dëmshëm për të drejtën e qytetarëve për përfaqësim demokratik, ndërsa Bashkimi Evropian shprehu shqetësim për politizimin e procesit zgjedhor dhe bëri thirrje për respektimin e Kushtetutës dhe standardeve demokratike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)