Kriset vëllazëria ruso-greke, Lavrov i zhgënjyer: Ratë pre e presionit të Ukrainës

Marrëdhëniet midis Rusisë dhe Greqisë nuk janë më të mirat e historisë që nga fillimi i pushtimit të Ukrainës. Kjo është reflektuar shpeshherë në gjuhën e përdorur nga diplomatët e të dy vendeve, por duket se në Moskë i kanë ashpërsuar edhe më shumë tonet kohëve të fundit.

Këtë e tregon gjuha e përdorur nga ministri i Jashtëm rus Sergey Lavrov gjatë një prezantimi të punës diplomatike të Moskës në vitin 2025, në një takim të pak ditëve më parë në Kremlin.

Lavrov e ka kritikuar ashpër Athinën për shkak të mbështetjes që po i japin Kievit dhe qëndrimi shefit të diplomacisë ruse për këtë çështje është paraqitur edhe në një postim nga Ambasada Ruse në Greqi.

Konkretisht, sipas postimit, në një pyetje përkatëse që mori, Lavrov deklaroi se me fillimin e luftës, "Greqia ndërpreu bashkëpunimin e saj me Rusinë, i cili ishte ndërtuar gjatë shumë dekadave”.

“Një spektër i tërë i bashkëpunimit ruso-grek u shpërbë, nga politika dhe ekonomia te kultura dhe çështjet humanitare. Pas gati katër vitesh, nuk ka pasur asnjë ndryshim në qasjen e Athinës zyrtare ndaj vendit tonë. Ne vazhdojmë të dëgjojmë deklarata agresive anti-ruse dhe akuza të pabaza rusofobe kundër nesh. Rusia nuk do të lejonte kurrë që diçka e ngjashme t'i ndodhte Greqisë”, është shprehur ai.

Ministri rus akuzoi Athinën për dërgimin e armëve në Ukrainë. "Ishte ndër të parat që dërgoi armë dhe municione në Ukrainë, të cilat forcat e armatosura në Kiev i përdorin çdo ditë kundër civilëve në Donbas, në rajonet Zaporozhye dhe Kherson, në Krime dhe rajone të tjera jugore të vendit tonë. Dhe e gjithë kjo pavarësisht faktit se një diasporë e madhe greke jeton atje për shekuj me radhë. Është e madhe, paqedashëse, e do atdheun e saj historik, gjithmonë në çdo mënyrë të mundshme ka forcuar lidhjet dhe kontaktet dhe kurrë nuk ka kontribuar në zhvillime ose trende negative. Por Athina nuk ka menduar për to”, ka nënvizuar ai.

Përveç kësaj, Lavrov u përqendrua edhe në marrëveshjen strategjike midis Athinës dhe Kievit, e cila u nënshkrua në nëntor, në lidhje me zhvillimin e dronëve detarë.

“Një konfirmim tjetër i sa më sipër ishin të ashtuquajturat marrëveshje me regjimin nazist në Kiev më 17 nëntor 2025, duke përfshirë zhvillimin dhe përdorimin e automjeteve pa pilot me bazë deti. Ky hap, si çdo veprim tjetër anti-rus i "Perëndimit kolektiv" që synonte mposhtjen e Rusisë në fushën e betejës mori vlerësimin e duhur nga ana jonë. Përveç kësaj, Athina iu bashkua iniciativës PURL për blerjen e armëve amerikane nga vendet evropiane për forcat e armatosura ukrainase, gjë që Greqia më parë kishte hezituar ta bënte. Nuk ka dyshim se "shokët e tyre të lartë" e theksuan me këmbëngulje këtë "lëshim" dhe përfundimisht e arritën qëllimin e tyre. Të gjithë e dinë se Kievi, indiferent ndaj aftësive mbrojtëse të vetë Greqisë, po ushtron presion metodikisht mbi udhëheqjen greke që t'u transferojë forcave të armatosura ukrainase sistemet shumë efektive të mbrojtjes ajrore të prodhuara nga Rusia dhe Bashkimi Sovjetik, të cilat aktualisht janë në shërbim të Forcave të Armatosura Greke. E gjithë sa më sipër tregon qartë totalitarizmin neoliberal që mbretëron në Bashkimin Evropian”, është shprehur Lavrov.

Numri dy i Kremlinit po ashtu ka nënvizuar se publiku grek nuk e ndan këtë qasje që ndiqet nga qeveria në Athinë. Sipas një sondazhi të kryer për gazetën "Kathimerini" në korrik 2025, 72% e të anketuarve besojnë se Athina duhet të mbajë një qëndrim neutral në konfliktin ukrainas.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)