Pas 50 vitesh pritje, drejt hapjes autostrada 1.4 miliardë euro që 'bashkon' Greqinë

Një nga projektet më ambicioze infrastrukturore në historinë moderne të Greqisë po hyn në fazën e tij finale. Pas 50 vitesh diskutimesh, pengesash politike dhe sfidash financiare, autostrada E65, që pritet të ndryshojë rrënjësisht hartën e transportit në vend, është tashmë drejt përfundimit, me punimet që kanë arritur në mbi 95%.

Sipas të dhënave më të fundit të publikuara nga kompania “Central Greece Motorway”, progresi në seksionin verior është pothuajse i plotë. Tunelet kanë përfunduar në 99.92%, urat në 99.54%, punimet e dheut në 99.84%, ndërsa asfaltimi ka arritur në 85.57%, me ritme intensive pune çdo ditë.

Pamjet e fundit ajrore nga segmenti Kallabaka-Oxynia tregojnë qartë se projekti ka hyrë në metrat e fundit. Sinjalistika rrugore është pothuajse e vendosur, ndërhyrjet përfundimtare janë drejt mbylljes dhe aksi i ri tashmë ngjan me një autostradë gati për t’u hapur për qarkullim.

Me një gjatësi totale prej 182.1 kilometrash dhe një investim prej rreth 1.4 miliardë eurosh, E65 është ndërtuar nga kompania TERNA si një aks krejtësisht i ri, që lidh Anthilin në Lamia me Kipourion në Grevena. Rruga përshkon rajone kyçe të Greqisë si Fthiotida, Thesalia dhe Maqedonia Perëndimore, duke krijuar një lidhje të drejtpërdrejtë mes lindjes dhe perëndimit të shtetit fqinj.

Foto: X/@Central Greece Motorway

Autostrada me dy korsi në secilin drejtim është projektuar për shpejtësi 110-120 km/orë dhe financohet kryesisht nga fondet evropiane të Rimëkëmbjes dhe Qëndrueshmërisë, çka ka përshpejtuar ndjeshëm afatet e realizimit.

Përfitimi për qytetarët do të jetë i menjëhershëm. Udhëtimi Athinë-Kardhicë do të zgjasë vetëm 2 orë e 35 minuta, ndërsa Athinë-Trikalla më pak se 3 orë. Pas përfundimit të seksionit verior, distanca drejt Meçovës do të përshkohet për rreth 4 orë, ndërsa udhëtimi nga kryeqyteti helen për në Kozani dhe Kostur do të reduktohet në rreth 4 orë e gjysmë.

Një ndikim i madh pritet edhe në transportin tregtar, pasi rruga nga porti i Pireut drejt Ballkanit Perëndimor do të shkurtohet me afro dy orë, duke eliminuar segmentet e vjetra të njohura për kthesat e rrezikshme si Domoko.

Përfitime të mëdha priten edhe për turizmin, pasi destinacione si Meteora, Liqeni i Plastirës, Meçova, Zagoria, Kozani dhe Kosturi, që do të bëhen shumë më të aksesueshme për vizitorët nga Athina.

Hapja e seksionit verior pritet në fund të qershorit 2026, edhe pse autoritetet greke ende nuk kanë shpallur një datë zyrtare. Ajo që duket e sigurt është se pritjes shumëvjeçare po i vjen fundi dhe një nga autostradat më të rëndësishme të Ballkanit është vetëm pak javë larg inaugurimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)