Shqipëria dhe Gjermania forcojnë bashkëpunimin në luftën kundër krimit të organizuar

Policia e Shtetit dhe Bundeskriminalamt kanë diskutuar në Tiranë thellimin e bashkëpunimit në luftën kundër krimit të organizuar ndërkombëtar dhe forcimin e kapaciteteve hetimore në Shqipëri. Në një takim zyrtar mes dy institucioneve, delegacioni gjerman i kryesuar nga Gregor Erb u prit nga Drejtori i Përgjithshëm i Policisë së Shtetit, Skënder Hita. Aty u diskutuan projektet e përbashkëta dhe prioritetet e reja të bashkëpunimit.

Palët u fokusuan në rritjen e koordinimit operacional, mbështetjen për Policinë Kriminale dhe zhvillimin e Institutit të Policisë Shkencore, me synimin për përmirësimin e hetimeve dhe luftën ndaj rrjeteve kriminale ndërkombëtare. Gjatë takimit, drejtori Hita vlerësoi mbështetjen e vazhdueshme të autoriteteve gjermane, duke theksuar se përballja me krimin modern kërkon partneritete të forta ndërkombëtare dhe shkëmbim të vazhdueshëm informacioni.

Nga ana e tij, përfaqësuesi i BKA-së rikonfirmoi angazhimin e Gjermanisë për të mbështetur Policinë e Shtetit përmes projekteve të përbashkëta, trajnimeve profesionale dhe pajisjeve moderne, që synojnë rritjen e kapaciteteve hetimore dhe teknike. Sipas dy institucioneve, ky bashkëpunim strategjik pritet të forcohet më tej në muajt në vijim, me fokus të veçantë në goditjen e krimit të organizuar dhe rrjeteve ndërkombëtare kriminale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)