Rama: “Paqja Fiskale” nis zbatimin në janar, tatim 5% mbi fitimin për pasqyrat fiskale të korrigjuara

Kryeministri Edi Rama ka zhvilluar sot një takim me komunitetin e biznesit, ku u diskutua gjerësisht mbi zbatimin e nismës së “Paqes Fiskale”, e cila pritet të hyjë në fuqi pas 8 ditësh.

Gjatë fjalës së tij, Rama theksoi se “Paqja Fiskale” është një zotim i bërë gjatë fushatës elektorale dhe sot është realitet ligjor, pavarësisht debateve që e kanë shoqëruar. Kjo paketë sipas kreut të ekzekutivit synon të krijojë një marrëdhënie të re besimi mes administratës tatimore dhe sipërmarrjes, si dhe të përgatisë biznesin shqiptar për procesin e integrimit europian.

“Paqja Fiskale është një zotim i yni nga fushata elektorale dhe sot është ligj, pavarësisht disa debateve të cilat nuk e adresuan dot thelbin e kësaj nisme. Sot jemi në kushtet që, duke nisur nga janari, mund ta zbatojmë këtë nismë. Është një nismë për të ndërtuar një urë të re besimi dhe një ndërveprim të shëndetshëm mes administratës tatimore dhe sipërmarrjes”, u shpreh Kryeministri.

Rama sqaroi se kjo nuk është një ide e re, por një instrument i përdorur prej mijëra vjetësh, që u jep mundësi bizneseve të rregullojnë situatat e tyre fiskale pa u ndëshkuar rëndë.

Sipas tij, bizneset do të kenë mundësi të vetëkorrigjohen duke ribërë deklarimet e viteve të shkuara, duke përfituar një normë shumë më të ulët tatimi mbi fitimin.

“Nuk është shpikje e jona. Ka lindur në Romën e Vjetër dhe është instrument i përdorur prej mijëra vjetësh. Është një instrument që i jep mundësi sipërmarrjeve që nuk janë në konflikt me ligjin dhe që figurojnë në regjistrat e shtetit si kontributorë legjitimë, të rishohin pasqyrat e tyre fiskale. Ky rishikim u jep mundësi sipërmarrjeve të korrigjohen duke ribërë deklarimet e viteve të shkuara dhe duke pasur si motivim një tatim shumë më të ulët mbi fitimin se ai që paguhet rregullisht. Për çdo pasqyrë të korrigjuar, fitimi tatohet vetëm 5 për qind”, tha Rama.

Në takim u diskutua gjithashtu për nisjen e një kapitulli të ri bashkëpunimi mes qeverisë dhe biznesit, me fokus formalizimin e ekonomisë dhe rritjen e qëndrueshme. Duke folur për Paketën Fiskale 2026, Rama siguroi se nuk parashikohet rritje taksash.

“Me Paketën Fiskale 2026 nuk rrisim taksat, por synojmë të garantojmë një kuadër më të drejtë fiskal dhe të përgatisim sipërmarrjen për procesin e integrimit europian. Mbajmë premtimin për zero taksa për biznesin e vogël deri në vitin 2029”, përfundoi Rama.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)