Policia reagon për protestën: Janë shoqëruar 23 persona, një i mitur iu dorëzua familjarëve

Gjatë protestës së zhvilluar ditën e sotme në Tiranë, të thirrur dhe organizuar nga Partia Demokratike, janë regjistruar episode dhune para Kryeministrisë dhe sallës së Kuvendit. Si pasojë e sulmeve me molotovë, lëndë piroteknike dhe sende të forta ndaj forcave të rendit, kanë mbetur të lënduar 11 punonjës policie, të cilët ndodheshin në krye të detyrës për garantimin e mbarëvajtjes së protestës, thuhet në një reagim zyrtar nga policia e Tiranës.

Të lënduarit janë transportuar dhe po marrin ndihmë mjekësore në Spitalin e Traumës dhe në repartin e djegies. Ata janë vizituar nga Drejtori Vendor i Policisë së Tiranës, Elton Alushi, si dhe nga Zëvendësdrejtori për Rendin, Dashnor Muhaj.

Policia bën me dije se, pavarësisht thirrjeve të vazhdueshme për ndalimin e akteve të dhunës, përmes qendrës së zërit, situata ka vijuar të përkeqësohet, duke detyruar ndërhyrjen e forcave të rendit për shpërndarjen e turmës, në përputhje me parashikimet ligjore në fuqi.

Ndërkohë, grupi hetimor, nën drejtimin e Prokurorisë së Rrethit Gjyqësor Tiranë, ka nisur menjëherë punën për dokumentimin ligjor të veprimeve të dhunshme të protestuesve ndaj punonjësve të Policisë. Shërbimet policore po analizojnë pamjet filmike për identifikimin e personave përgjegjës dhe shoqërimin e tyre në ambientet e Policisë.

Deri në këto momente janë shoqëruar 23 persona, ndërsa gjatë verifikimeve ka rezultuar se një prej tyre është i mitur. Policia sqaron se për të miturin janë njoftuar menjëherë prindërit dhe ai është mbajtur në zyrën e pritjes së qytetarëve, deri në marrjen në dorëzim nga familjarët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)