Trafikuan 219 kg “skunk” në Pire, zbulohet organizata shqiptaro-greke e drogës

Policia greke ka sekuestruar rreth 219 kilogramë kanabis sativa me përqindje të lartë THC-je të llojit “skunk” gjatë një operacioni antidrogë në zonën e Pireut, ndërsa tre persona janë arrestuar si pjesë e një rrjeti të dyshuar greko-shqiptar të trafikut të drogës.

Gjatë kontrolleve në ambientet e një kompanie transporti në Atikën Perëndimore, policia zbuloi dy arka druri të modifikuara, brenda të cilave ishin fshehur 108 pako plastike me rreth 122 kilogramë kanabis të papërpunuar që dyshohet se vinin nga Spanja.

Një ditë më vonë, në të njëjtin vend u zbuluan edhe dy arka të tjera me 85 pako shtesë, që përmbanin rreth 96 kilogramë kanabis. Pas këtij zbulimi, autoritetet organizuan një dorëzim të kontrolluar të drogës me qëllim identifikimin e personave që do ta merrnin ngarkesën.

Dy persona u arrestuan në momentin që hynë me një furgon në një depo nëntokësore në Athinë për të marrë arkat. Të ndaluarit janë një 42-vjeçar grek dhe një 46-vjeçar shqiptar. Në depo u gjetën edhe mjete që dyshohet se përdoreshin për hapjen dhe izolimin e arkave.

Një 58-vjeçar grek u arrestua më pas në zonën e Nikeas, pasi kishte dhënë me qira magazinën ku u dërgua droga. Vlera e kanabisit të sekuestruar llogaritet mbi 750 mijë euro, ndërsa hetimet vijojnë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)