“Në fund të 2027 mbyllim negociatat me BE”, Rama i përgjigjet PD-së: E refuzoj me neveri narrativën e korrupsionit

Kryeministri Edi Rama, gjatë fjalës së mbajtur në Asamblenë e Partisë Socialiste në njësinë nr.12 në Tiranë, iu përgjigj akuzave të opozitës për rritje të korrupsionit gjatë 13 viteve të qeverisjes socialiste. Ai i cilësoi këto pretendime si një “gënjeshtër të madhe”.

Rama tha se është e pamundur të pretendohet rritje e korrupsionit, kur vendi ka shënuar rritje të ekonomisë dhe të ardhurave. “Nuk mund të çohet askush e të thotë me plot gojën është rritur korrupsioni. Kjo është gënjeshtër e madhe, se s’mund të rritej ekonomia, pagat dhe pensionet”, u shpreh ai.

Në këtë kuadër, kryeministri solli edhe shifra lidhur me turizmin, duke theksuar se Shqipëria ka pasur një rritje të ndjeshme të vizitorëve të huaj. “Dikur na kujtonin mua dhe Kujtim Qefalinë si turistë në Rinas, ne sot numërojmë vetëm pasaportat e huaja, vjet kemi numëruar 12 milionë të tilla”, tha Rama.

Kryeministri shtoi se opozita përdor vazhdimisht të njëjtën retorikë, duke e quajtur të papranueshme. “E refuzoj me neveri këtë narrativë, s’dinë të thonë gjë tjetër vetëm vjedhje-vjedhje, korrupsion-korrupsion”, shtoi kryeministri.

Foto: Edi Rama/Facebook

Në një tjetër deklaratë, gjatë mbledhjes së Asamblesë socialiste në Baldushk, Rama foli për procesin e integrimit europian. “Deri në fund të 2027 mbyllim negociatat me BE”, u shpreh ai. Rama shpjegoi se procesi ka dy nivele vendimmarrjeje dhe se vendimi final varet nga 27 vendet anëtare, ku mjafton edhe një shtet të vendosë veton. “Mjafton një vend të thotë nuk duam dhe vendimi nuk merret”, tha Rama, duke akuzuar opozitën se ngatërron interesin partiak me atë kombëtar dhe se “janë kundër” në një moment kyç për vendin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)