Sot mesha e Pashkëve katolike, Arqipeshkvi Dodaj: Ndryshimi fillon nga zemra e njeriut

Në prag të Pashkës katolike, Arqipeshkvi Metropolit i Tiranë-Durrësit, Imzot Arjan Dodaj ka përcjellë një mesazh për besimtarët. Thirrja e tij erdhi vetëm pak para meshës që pritet të mbahet mbrëmjen e kësaj të shtune në Katedralen e “Shën Palit” në Tiranë.

Dodaj u kërkoi qytetarëve të mos dorëzohen përballë sfidave dhe të ruajnë shpresën, duke theksuar se ndryshimi është i mundur. “Vdekja nuk e ka më fjalën e fundit: ndryshimi është i mundur dhe fillon nga zemra e njeriut”, u shpreh ai.

Në fjalën e tij, Imzot Dodaj ndaloi edhe te problematikat që po e rëndojnë shoqërinë shqiptare, si emigracioni dhe indiferenca. Ai theksoi se vendi nuk duhet të presë zgjidhje nga të tjerët.

“Vendi ynë nuk duhet të presë që e drejta apo e ardhmja do të na vijë nga jashtë... kjo para së gjithash është një përgjegjësi e secilit prej nesh”, tha Dodaj, duke shtuar se të qenit shqiptar nuk është çështje propagande, por përgjegjësi ndaj brezave të rinj.

Gjithashtu, ai kishte një apel edhe për politikën dhe institucionet, duke kërkuar ndershmëri dhe më shumë përgjegjësi në drejtimin e vendit. “Shqipëria ka nevojë për burra dhe gra të ndershme. Ka nevojë për ndërgjegje reaguese që nuk pranojnë korrupsionin, padrejtësinë dhe mënjanimin si diçka normale”, theksoi Arqipeshkvi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)