Ipeshkvijtë e Shqipërisë urojnë së bashku besimtarët katolikë për Krishtlindje

Ipeshkvijtë e Kishës Katolike të Shqipërisë kanë përcjellë një urim të përbashkët për të gjithë besimtarët e krishterë me rastin e festës së Krishtlindjes.

Të bashkuar në një frymë vëllazërore, ata kanë vendosur që këtë vit t’i drejtohen së bashku popullit shqiptar. Imzot Gjergj Meta, në emër të ipeshkvijve, theksoi rëndësinë e këtij urimi të përbashkët, duke kujtuar edhe një figurë të dashur të Kishës.

“Të dashur vëllezër dhe motra, këtë urim Krishtlindjesh duam t’ua bëjmë së bashku me ipeshkvijtë e Shqipërisë. Do të kishim dashur që në këtë urim të ishte pjesë edhe Imzot Simon Kulli, ipeshkvi i Sapës, por jemi të sigurt se ai na i uron nga qielli dhe lutet për ne. Secili nga ne ka një fjalë për t’iu drejtuar popullit të Zotit që është në Shqipëri”, tha ai.

Në mesazhin e tij, Imzot Giovanni Peragine u ndal te domethënia e thellë shpirtërore e Krishtlindjes.

“Krishtlindja na kujton se Zoti është pranë nesh. Ai bëhet veçanërisht i pranishëm atje ku ka vështirësi, pasiguri dhe vuajtje. Të kremtosh Krishtlindjen do të thotë të ndiesh praninë e Zotit. Mos mendoni vetëm për veten, jo vetëm të marrim, por mbi të gjitha të japim, jo të fitojmë gjithçka për vete, por të hapim dyert e zemrave ndaj të tjerëve.”

Ndërsa Imzot Arjan Dodaj e përshkroi Krishtlindjen si një thirrje për ndryshim dhe shpresë. “Krishtlindja është dalja nga errësira. Populli ynë le të dalë nga fryma e errët e çdo distance dhe e çdo mungese shprese.”

Nga ana e tij, Imzot Ottavio Vitale vuri theksin te familja, paqja dhe falja. “Të begatojmë familjet tona dhe të pranojmë me lutje e gëzim atë që po vjen. ‘Ndryshoni dhe kthehuni tek unë’, thotë Zoti. Nëse ne nuk jemi njerëz të paqes, si mund të themi se e duam Zotin, nëse nuk jemi të gatshëm të falim atë që na ka ofenduar?”.

Çdo 25 dhjetor, besimtarët e krishterë festojnë lindjen e Jezu Krishtit, një festë që kremtohet në familje, në lutje, dashuri dhe paqe. Krishtlindja përcjell mesazhin e shpresës dhe të dritës, duke ftuar njerëzit të jenë më pranë njëri-tjetrit, të falin dhe të ndajnë gëzimin me ata që kanë më shumë nevojë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)