“Shqipëria ka mjekë fantastikë”, Rama viziton Spitalin Rajonal të Lezhës: Do të rrisim pagat

Kryeministri Edi Rama vizitoi sot Spitalin Rajonal të Lezhës, ku bisedoi me mjekët dhe infermierët për kushtet e punës dhe planet e qeverisë për zhvillimin e sektorit shëndetësor. Kreu i qeverisë theksoi se rritja e pagave ka qenë e ndjeshme falë zhvillimit ekonomik, duke shtuar se synimi është të ofrohen paga dinjitoze për bluzat e bardha.

“Po përpiqemi që mjekët të kenë një pagë dinjitoze. Rritja ka qenë domethënëse për shkak të rritjes së ekonomisë, përfshirë indeksimin e rrogave dhe vjetërsinë e punës. Tani ekonomia po na ndihmon të rrisim pagat për mjekët, mësuesit, ushtarakët dhe të tjerët. Spitali është modern dhe nuk kam konstatuar ankesa për infrastrukturën. Krijimi i shërbimit të kimioterapisë është fantastik dhe do të lehtësojë shumë njerëz. Mjekët dhe infermierët janë shumë të mirë, por duhet përmirësuar edhe menaxhimi”, tha Rama.

Kryeministri foli edhe për idenë e krijimit të një spitali privat brenda spitalit publik, me qëllim që mjekët të ndihen bashkëpronarë të objektit ku punojnë. “Është me rëndësi që të ndërtohet një spital privat brenda spitalit dhe të jetë pjesë e sistemit të punës së tyre. Kur mjekët ndjehen bashkëpronarë, mirëmbajtja është më e mirë. Biseda ishte e këndshme edhe për shkak të ambientit të ri. Mjekët shqiptarë që kanë punuar në kushte të tjera janë heronj, por procesi i modernizimit të godinave nuk do të ndalet”, deklaroi kryeministri.

Foto: Edi Rama/Facebook

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)