home-icon SHQIPËRI Kronikë

Kushtetuesja rrëzon Ilir Metën, lë në fuqi arrestin me burg: Masa e ligjshme dhe proporcionale

Në vendimin e saj, Gjykata thekson se masa ndaj Metës është vendosur në përputhje me Kushtetutën dhe standardet ligjore. “Masa e sigurimit personal ndaj kërkuesit është e vendosur për një qëllim të ligjshëm, garantimin e mbarëvajtjes së procesit penal në ngarkim të tij.”

Autori:

Redaksia Newsmax Balkans

08.04.2026. 16:37

facebook twitter linkedin link mail
Kushtetuesja rrëzon Ilir Metën, lë në fuqi arrestin me burg: Masa e ligjshme dhe proporcionale
Foto ilustruese

Gjykata Kushtetuese ka rrëzuar kërkesën e ish-Presidentit, Ilir Meta, për shfuqizimin e masës së sigurisë “arrest në burg”, duke e cilësuar atë si të ligjshme dhe proporcionale.

Me shumicë votash, togat e zeza vendosën të lënë në fuqi vendimet e mëparshme të GJKKO dhe të Gjykatës së Lartë, duke i dhënë një tjetër goditje përpjekjes së kreut të Partisë së Lirisë për të fituar lirinë.

Në vendimin e saj, Gjykata thekson se masa ndaj Metës është vendosur në përputhje me Kushtetutën dhe standardet ligjore. “Masa e sigurimit personal ndaj kërkuesit është e vendosur për një qëllim të ligjshëm, garantimin e mbarëvajtjes së procesit penal në ngarkim të tij.”

Gjithashtu, sipas Gjykatës, ekzistojnë elemente që justifikojnë dyshimin e arsyeshëm. “Në çështjen penale ndaj kërkuesit duket se ka fakte dhe informacione që arrijnë të bindnin një vëzhgues të jashtëm se kërkuesi mund të ketë kryer veprat penale për të cilat dyshohet.”

Në këtë kuadër, Kushtetuesja vlerëson se kufizimi i lirisë nuk është bërë në mënyrë arbitrare dhe se masa nuk është e tepruar.

LEXO MË SHUMË

“Nuk mund të arrihet në përfundimin se kufizimi i lirisë së tij është kryer në mungesë të dyshimit të arsyeshëm. Ajo nuk është joproporcionale në kontekstin e rrethanave të çështjes dhe nevojave të sigurimit.”

Një tjetër pikë kyçe e vendimit lidhet me pretendimet e Metës për mënyrën e arrestimit në tetor 2024, ku Kushtetuesja vendosi të mos e marrë në shqyrtim këtë çështje.

Sipas saj, kjo lidhet me faktin se procedimi penal është ende në zhvillim në Prokuroria e Tiranës.

“Në kushtet kur nuk ka ende një vendim përfundimtar nga gjykatat e zakonshme mbi këtë çështje, Gjykata vlerësoi se nuk mund ta marrë në shqyrtim duke qenë se kontrolli i saj ka natyrë subsidiare.”

Pak pas vendimit përmes një postimi në llogarinë e Metës në Facebook, ish-Presidenti shprehu qëndrimin e tij duke thënë se nuk ka “asnjë suprizë nga Gjykata e Lanës”.

Meta kërkon që vendimi i Kushtetueses të zbardhët në kohë dhe premton se çështja e tij do të shkojë deri në Gjykatën e Strasburgut.

“Pasi e zvarriti çështjen prej 6 muajsh, përtej çdo afati të arsyeshëm, me qëllim, vonimin në rrugën tonë drejt Strasburgut, sot tregoi edhe njëherë se kjo Gjykata nuk di të zhgënjejë.

Vlerësimin tim për të e kam thënë që më 2 Mars 2020 kur këta betoheshin te Lana. Por se paku të kenë fare pak dinjitet dhe të mos vonojnë zbardhjen e vendimit të tyre.

Edhe njëherë i ftoj të gjithë mediat dhe gazetarët, më 27 prill, në seancën e parë të gjykimit në themel, dhe në të gjitha seancat e tjera, ku do të jem ballë për ballë me bandën, që më rrëmbeu në mënyrë banditeske dhe ku do të çmontojmë këtë proces farsë të neveritshëm të drejtësisë me regji”, shkruan ai.

Ilir Meta ndodhet në paraburgim që prej tetorit 2024, pas akuzave për korrupsion, shpërdorim detyre dhe fshehje pasurie të ngritura nga SPAK. Ndërkohë, më 27 prill, në orën 11:00, pritet të mbahet seanca e parë në themel në GJKKO për Metën dhe katër të pandehur të tjerë.

Meta dhe bashkëshortja e tij Monika Kryemadhi kanë kërkuar gjykim të zakonshëm, ndërsa tre të pandehurit e tjerë kanë kërkuar procedurë të shkurtuar.

Shkarkoni aplikacionin Newsmax Balkans:

AppStore GooglePlay
Etiketat:
Ilir Meta Gjykata Kushtetuese

Komente (0)