Dy Bylis-a në një kategori, FSHF merr vendimin

Federata Shqiptare e Futbollit ka sqaruar situatën e krijuar pas përfundimit të sezonit futbollistik, ku ekipi i Bylis ra nga “Abissnet Superiore” në Kategorinë e Parë, ndërsa ekipi i dytë i klubit, Bylis B, siguroi ngjitjen në të njëjtën kategori përmes ndeshjeve play-off të Kategorisë së Dytë.

Sipas rregullores së FSHF, dy ekipe të të njëjtit klub nuk lejohen të marrin pjesë në të njëjtën kategori. Për këtë arsye, edhe pse Bylis B e fitoi ngjitjen , ai nuk mund të luajë në Kategorinë e Parë për sezonin 2026/27.

Rregullorja përcakton gjithashtu se në rastet kur ekipi i parë i klubit zbret në kategorinë ku ndodhet ekipi rezervë, atëherë skuadra “B” bie automatikisht një kategori më poshtë. Si pasojë, Bylis B do të rikthehet në Kategorinë e Dytë sezonin e ardhshëm.

Për shkak se rregullorja nuk parashikon qartë mënyrën e plotësimit të vendit vakant të krijuar në Kategorinë e Parë, çështja iu kalua për shqyrtim Komitetit Ekzekutiv të FSHF-së.

Pas konsultimeve me Komisionin e Ligave dhe Garave dhe Komisionin Ligjor, FSHF vendosi që vendi vakant të përcaktohet përmes një ndeshjeje të vetme play-off mes Kukësit dhe Butrintit.

Takimi do të zhvillohet në një stadium neutral dhe fituesi do të sigurojë pjesëmarrjen në Kategorinë e Parë për sezonin sportiv 2026/27.

FSHF bëri me dije se detajet për datën, orarin dhe stadiumin ku do të luhet ndeshja do të publikohen në ditët në vijim nga Departamenti i Garave.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)