“NATO ngeli në provim”, Shtëpia e Bardhë: Trump do diskutojë largimin e SHBA nga Aleanca me Rutte

Presidenti amerikan Donald Trump tha sot se aleatët e NATO-s "u testuan dhe dështuan" kur ai nisi një luftë me Iranin dhe nuk i erdhën në ndihmë Shteteve të Bashkuara.

Sekretarja e shtypit e Shtëpisë së Bardhë, Caroline Levitt përcolli "pakënaqësinë" e Presidentit me NATO-n, pak para se të fillonin bisedimet e tij zyrtare me Sekretarin e Përgjithshëm të NATO-s, Mark Rutte.

"Do të shtoja se është mjaft e trishtueshme që NATO i ktheu shpinën popullit amerikan gjatë gjashtë javëve të fundit, kur është populli amerikan që ka financuar mbrojtjen e tyre", ka thënë Trump, sipas një deklarate që Leavitt lexoi në konferencën për shtyp.

Sipas asaj që tha Levitt, Trump beson se Aleanca u testua në praktikë dhe në fund dështoi gjatë konfliktit me Iranin. Kjo deklaratë përcakton tonin për një takim ku qëndrimi i SHBA-ve në NATO do të jetë në qendër të agjendës.

Vërejtjet e presidentit amerikan nuk mbetën vërejtje të përgjithshme, pasi Leavitt përdori fjalët e tij për të përshkruar zhgënjimin e qeverisë me performancën e aleatëve.

Siç u njoftua, kritika përqendrohet në faktin se NATO nuk i përmbushi pritjet gjatë krizës, gjë që forcon argumentin për një rishikim të angazhimeve të Uashingtonit.

Sekretari i Përgjithshëm i NATO-s, Mark Rutte do të pritet sot në Uashington nga Donald Trump një ditë pas marrëveshjes dyjavore të armëpushimit me Iranin dhe ndërsa presidenti amerikan ka kritikuar partnerët e tij në Aleancën e Atlantikut të Veriut. Leavitt tha se presidenti mezi pret të zhvillojë një "bisedë shumë të sinqertë dhe të hapur" me Rutte-n.

Kur u pyet nëse SHBA-të ende po shqyrtonin tërheqjen nga NATO, ashtu siç pati paralajmëruar gjatë kësaj jave, Leavitt tha se "është diçka që presidenti e ka diskutuar dhe mendoj se është diçka që presidenti do ta diskutojë pas disa orësh me Sekretarin e Përgjithshëm Rutte".

Presidenti republikan ka kërcënuar të tërhiqet nga aleanca transatlantike me 32 anëtarë dhe ka dënuar aleatët evropianë të Uashingtonit në javët e fundit për atë që ai e quajti mbështetje të pamjaftueshme për sulmin amerikano-izraelit ndaj Iranit.

Trump u ka bërë thirrje vendeve të Gjirit që varen nga nafta të thyejnë bllokadën e Iranit ndaj Ngushticës së Hormuzit, por vendet evropiane e kanë bërë të qartë se nuk do të marrin pjesë në fushata minimi apo misione të tjera për të liruar anijet ndërsa vazhdojnë armiqësitë në Lindjen e Mesme.

Sakaq, Rutte, i njohur në Evropë si "pëshpëritësi i Trumpit", ka kultivuar një marrëdhënie të ngrohtë me shefin e Shtëpisë së Bardhë pavarësisht tensioneve dhe vitin e kaluar e përshkroi atë si një "baba" që po trajtonte një sherr në shkollë midis Izraelit dhe Iranit.

Ngërçi mbi Iranin ka përkeqësuar shqetësimet transatlantike në lidhje me Ukrainën, Groenlandën dhe shpenzimet ushtarake, megjithëse zyrtarë të lartë amerikanë i kanë siguruar privatisht qeveritë evropiane se administrata mbetet e përkushtuar ndaj NATO-s.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)