Raundi i dytë i bisedimeve SHBA-Ukrainë në Berlin, Kievi: Jemi pranë marrëveshjes

Është mbyllur raundi i dytë i bisedimeve në Berlin mes Përfaqësuesve të Shteteve të Bashkuara dhe Ukrainës, në përpjekje për të shënuar përparime konkrete drejt një armëpushimi dhe një marrëveshjeje të mundshme paqeje me Rusinë.

Takimi u zhvillua në prani të presidentit ukrainas Volodymyr Zelensky, ndërsa delegacioni amerikan u kryesua nga i dërguari special i SHBA-së, Steve Witkoff dhe Jared Kushner, dhëndri i presidentit amerikan Donald Trump.

Edhe pse nuk janë bërë publike detaje konkrete mbi përmbajtjen e dakordësive, Kievi shprehet optimist.

Shefi për Sigurinë Kombëtare të Ukrainës dhe kryenegociatori Rustem Umerov deklaroi se janë shënuar “përparime të vërteta” dhe se një dakordësi që i afron palët me paqen mund të arrihet brenda kësaj të hëne.

Në qendër të diskutimeve mbeten dy çështje; orientimi strategjik i Ukrainës dhe territori i Donbasit. Presidenti Zelensky ka dhënë sinjale se Ukraina mund të tërhiqet nga synimi për anëtarësim në NATO, duke theksuar se garancitë dypalëshe të sigurisë mund të shërbejnë gjithashtu si mekanizëm parandalues ndaj një agresioni të ri rus.

Ndërkohë, sipas AFP, negociatorët amerikanë kanë kërkuar sërish që Ukraina të heqë dorë nga rajoni i Donbasit, një kërkesë që përkon me qëndrimin e Moskës dhe që është refuzuar nga Kievi. Një zyrtar i lartë ukrainas e cilësoi këtë qëndrim si befasues, duke nënvizuar se SHBA po adoptojnë kërkesa ruse në këtë pikë.

Në mbrëmje, Witkoff dhe Kushner pritet të marrin pjesë në një darkë pune me liderë evropianë, të organizuar nga kancelari gjerman Friedrich Merz, ku do të vijojnë konsultimet për rolin e Evropës në procesin e paqes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)