Njësia elitare e ushtrisë daneze me qen që mbron Groenlandën

Patrulla Sirius është një nga njësitë më të veçanta dhe më të heshtura ushtarake në botë. Që prej 85 vitesh, ushtria daneze mbron Groenlandën jo me trupa të shumta apo armë të rënda, por me një strategji minimale, dy burra, një slitë dhe me dhjetëra qen për çdo patrullë. Detyra e tyre është të mbikëqyrin pjesën lindore të Groenlandës, zonë që përbën shkretëtirën e akullt më të madhe në planet.

Kjo njësi elitare e ka origjinën gjatë Luftës së Dytë Botërore, kur Danimarka u pushtua nga Gjermania naziste në vitin 1940 dhe Groenlanda mbeti e izoluar. Ishulli u shndërrua shpejt në një territor strategjik kyç për kontrollin e Atlantikut të Veriut, trafikun ajror dhe informacionin meteorologjik. Gjermanët nisën të instalonin stacione sekrete të motit në bregun lindor, duke detyruar një reagim të përbashkët danezo-amerikan.

Në mungesë të një mbrojtjeje klasike ushtarake, u krijua një formë patrullimi e bazuar te njohja e terrenit dhe mbijetesa ekstreme. Inuitë vendas, kolonë danezë dhe norvegjezë u bënë bërthama e kësaj force që më vonë do të institucionalizohej si Patrulla Sirius në vitin 1950. Që prej atëherë, mënyra e veprimit ka mbetur pothuajse e pandryshuar.

Gjatë Luftës së Ftohtë, Groenlanda u shndërrua në vijë të parë mbrojtjeje për Perëndimin, por Sirius vazhdoi të ruante bregun lindor, duke ushtruar njëkohësisht rolin e policisë, rojës së natyrës dhe autoritetit civil në Parkun Kombëtar të Verilindjes së Groenlandës, më i madhi në botë.

Sot, teksa shkrirja e akujve po hap rrugë të reja detare dhe po rrit interesin e fuqive të mëdha, rëndësia e Sirius po rritet sërish. Megjithëse teknologjia moderne po shtohet, thelbi mbetet i njëjtë, në Arktik nuk fiton ai që ka më shumë fuqi, por ai që di të qëndrojë dhe të përballojë kushtet ekstreme për më shumë kohë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)