Zgjidhja kundër trafikut, 25 mijë euro për personat që heqin dorë nga patenta

Të përfitosh deri në 25 mijë euro nëse vendos të mos marrësh patentën për drejtimin e automjetit. Kjo është zgjidhja që ka dhënë qeveria e Maltës për të luftuar trafikun në rritje në ishull. Iniciativa e re ka nisur nga të rinjtë.

Masa tashmë ka hyrë në fuqi dhe 100 të rinjtë e parë nën moshën 30 vjeç e kanë pranuar ofertën. Ata do të marrin përfitimin financiar në këmbim të angazhimit që të mos drejtojnë automjete për pesë vjet. Për të lehtësuar lëvizjen e tyre, autoritetet kanë vendosur në dispozicion transport publik falas, duke përfshirë autobusët në të gjithë arkipelagun.

Qëllimi i kësaj nisme është ulja e trafikut, i cili është bërë një problem serioz në vend. Aktualisht në Maltë qarkullojnë rreth 457 mijë automjete, ndërsa vetëm në tremujorin e fundit të vitit 2025 janë regjistruar 3,754 makina të reja. Edhe pse numri i automjeteve është relativisht në përpjesëtim të drejtë me popullsinë, territori i vogël i vendit prej afro 317 kilometra katrorë, e bën situatën shqetësuese.

Sipas të dhënave ndërkombëtare, Malta renditet në vendin e 32-të në botë për raportin mes popullsisë dhe numrit të makinave në qarkullim. Ndërkohë Italia ndodhet në vendin e 12-të, ndërsa San Marino mban vendin e parë. Nisma është promovuar nga qeveria laburiste e kryeministrit Robert Abela, e cila synon të përballojë edhe rritjen e shpejtë të popullsisë.

Malta ka aktualisht ritmin më të lartë të rritjes demografike në Europë, me 3,83% rritje gjatë vitit të fundit. Në dy dekadat e fundit, dendësia e popullsisë në vend është rritur nga 1,263 në 1,766 banorë për kilometër katro. Në vetëm dhjetë vitet e fundit, popullsia e Maltës është rritur nga 440 mijë në rreth 550 mijë banorë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)